68. De sancto Mauritio.

1. Ave, dux sanctissime,

Mauriti, Thebaeae
Legionis maximae

Et caeli choreae,
Da virtutes animae

Tua prece meae,
Ut non fiam bestiae

Socius leteae.

2. Ave cum exercitu

Tu qui baptizaris
Tuo et in spiritu

Sancto renovaris,
Ne mergar in transitu

Huius mundi maris,
Caelesti me habitu

Orna, quo ornaris.

3. Ave tu, qui mitteris

Ad opem pagano,
Parcere remitteris

Illi corde sano,
Solve, quia poteris,

Me de mundo vano,
Ut vitam, qua frueris,

Cursu carpam plano.

4. Ave, cum consortibus

Qui collum extendis
Et pro permanentibus

Transitura vendis,
Me ab infernalibus

Eripe emendis
Emundans ab omnibus
Peccatorum mendis.

5. Ave, qui ad sidera

Conscendis polorum
Cum turba innumera

Comitum tuorum,
Ad gustum me propera

Ferre gaudiorum
Sic, ut sim in libera

Sorte beatorum.