72. De sancto Paulo.

1. Ave, vas electionis,

Paule, doctor gentium,
Propelle abusionis

Omnis a me vitium,
Nullius confusionis

Turbet me flagitium,
Sed in me devotionis

Vivat desiderium.

2. Ave, qui pro Christo plura

Tulisti martyria,
Auferri a me procura

Satanae incendia
Nefandaque carnis iura

Atque desideria,
In vita per te futura

Sim sine miseria.

3. Ave, qui mori cupisti,

Ut vivas feliciter,
Mortem pro vita dedisti,

Nam vivis perenniter,
Moriar ut mundo isti,

Largire velociter,
Non ultra peccato tristi

Vivam ignobiliter.

4. Ave, meae robur spei,

O tutum refugium,
Ecce sic, ut timent rei,

Timeo supplicium,
Hostis ergo per te mei

Evadam opprobrium,
Mihi tuo, serve Dei,

Dulce sis praesidium.

5. Ave, possedisti thronum

Qui iam duodecimum,
Ad verum me deduc bonum,

Bonum felicissimum,
Da caeleste mihi donum,

Datum doni optimum,
Ut in caelis psallam tonum

Cum sanctis dulcissimum.