74. De sancto Philippo.

1. Ave, verbum praedicas

Philippe qui Dei,
Corpus tuum dedicas

Vitae sanctae spei,
Lucrum tibi vendicas

Dulcis requiei,
Dum cum Christo iudicas,

Esto memor mei.

2. Ave, qui os diceris

Recte lampadarum,
Mei faeces sceleris

Et miseriarum
Terge, lumen ceteris

Dei das viarum,
Vae mihi, si praeteris

Me, lux animarum.

3. Ave, qui melliflua

Doces voce gentem,
Collustras luciflua

Face quarum mentem,
Appetam ne fatua,

Adiuva me flentem,
Sed sequar per ardua

Caeli te scandentem.

4. Ave, qui in Scythia

Es affixus cruci,
Tua per suffragia

Superorum luci
Iungar, non per vitia

Inferorum duci,
Sed ad vera gaudia

Me precor induci.

5. Ave, qui lapidibus

Exsultas necatus,
Iungeris caelestibus

Digne laureatus,
Tuis fiat precibus

Felix meus status,
Ut cum sanctis omnibus

Gratuler salvatus.