75. De sancto Quirino.

1. Ave, qui baptismate

Gaudes Deo natus,
Quirine, charismate

Sancto confortatus,
Sancto per te pneumate

Gaudeam novatus
Atque diademate

Virtutis ornatus.

2. Ave, qui errantibus

Es risus effectus
Linguamque vellentibus

Amator perfectus,
Heu, cum sim erroribus

Nimiis infectus,
Tuis sana precibus

Iam meos defectus.

3. Ave, dux, qui manibus

Pro Christo privaris,
Digne cum martyribus

Sanctis laurearis,
Ne submergar sordibus

Huius mundi maris,
Salva me de manibus

Daemonum avaris.

4. Ave, quia pedibus

Gaudebas truncatis
Dans exemplar omnibus

Forte Deo gratis,
Absolve me precibus

Cunctis a peccatis
Virtutumque floribus

Exorna beatis.

5. Ave, qui per gladium,

Quem sustinuisti,
Complesti martyrium

Sicut voluisti,
Omne de me noxium

Fuga, quod vicisti,
Ducens in palatium

Regni Iesu Christi.