76. De sancto Silvestro.

i. Ave, admirabilis

Silvester beate,
Lumen venerabilis

Vitae spargens late,
Cum sim, heu, culpabilis,

Pro me scutum da te,
Post te curram stabilis

Cursu famae gratae.

2. Ave, papa, viduam

Fovens et pupillum,
Famam fers mellifluam

Et laudis vexillum,
Da post culpam fatuam

Mihi cor tranquillum,
Ut omnino destruam

Peccati sigillum.

3. Ave, qui mirifice

Constantinum ducem
Conducis catholicae

Fidei ad lucem,
Me reum ad publicae

Poenae liga crucem,
Ut meum magnifice

Vincam hostem trucem.

4. Ave, qui legaliter

Convincis Iudaeum
Ad fidem salubriter

Convertendo eum,
Peto, cor velociter,

Mihi redde meum,
Per quod multiformiter

Irritavi Deum.

5. Ave, qui ad solium

Festinas polorum
Et ad sodalitium

Praedulce sanctorum,
Mihi nunc consortium

Procurans bonorum,
Me duc ad convivium

Tecum angelorum.