86. De sancto Wilhelmo.

1. Ave, o aetheree

Wilhelme, dux mitis,
Non tumultus terreae

Superat te litis,
Ora, ne tartareae

Me fax urat sitis,
Sed caelestis vineae

Me fecundet vitis.

2. Ave, qui feliciter

Commutas terrena,
Ut fruaris dulciter

Pro his caeli cena,
Pete, ne me turpiter

Culpae voret poena,
Sed sit meo iugiter

Cordi pax serena.

3. Ave, qui malitiam

Proicis mundanam,
Probans esse gloriam

Ipsius insanam,
Da, ne culpam noxiam

Sequar neque vanam,
Ita conscientiam

Habeam ut sanam.

4. Ave, qui monasticos

Comitaris flores
Exempli salvificos

Pii rorans flores,
Ut non diabolicos

Sequar deceptores,
Mihi da angelicos

Tua prece mores.

5. Ave, qui ad gaudium

Transis gaudiorum,
Permutans consortium

Pro mundo sanctorum,
Confer, ut solacium

Fugiam pravorum,
Et sit mihi praemium

Dator praemiorum.