87. De ss. Scholastica, Dorothea, aliis.

1. Ave, o Scholastica,

Virgo grata Deo,
Cane pro me cantica

Plausu iubilaeo,
Desit diabolica

Poena mihi reo,
Claudant regna caelica

Me cum Iesu meo.

2. Ave, Dei filia,

Virgo Dorothea,
Scandis ad caelestia

Per Christi tropaea,
Inter caeli lilia

Fulges quasi dea,
Sis mihi propitia,

Dulcis sponsa mea.

3. Ave, o Eugenia,

Sponsa Christi cara,
Virtute in patria

Caeli flores clara,
Deo reconcilia

Me, dulcis et gnara,
Evadam supplicia

Inferni amara.

4. Ave, Dei Brigida

Sponsa praeelecta,
Da, ne mea frigida

Mens sit et abiecta,
Sed fac tua vivida

Prece, ut sit recta
Deoque per florida

Opera dilecta.

5. Ave, caeli litium,

Gerdrudis regalis,
Tu Christi sacrarium,

Angelis aequalis,
Meis Dei filium

Precare pro malis,
Ut post hoc exsilium

Eius sim sub alis.

6. Ave, lucis facula,

Virgo Petronilla,
Omni carens macula,

Magna et pusilla,
Vitae mihi pocula

Dulci prece stilla,
Sit per cuncta saecula

Mea mens tranquilla.

7. Ave, dei filio

Thecla desponsata,
Castitatis lilio

Tota decorata,
Me a carnis vitio

Libera, o grata,
Et conduc cum gaudio

Ad regna optata.

8. Ave, Afra, linea

Emendationis,
Quae fuisti framea

Prius Babylonis,
Ob te me non lancea

Laedat ultionis,
Sed laetum det vinea

Retributionis.

9. Ave, virgo rosea,

O Anastasia,
Fulta vitae trabea

In hac mundi via,
Mea ne sit carnea

Mens, fac prece pia,
Sed sim in siderea

Tecum monarchia.

10. Ave, o Ottilia,

Tota gratiosa,
Dei vivi filia,

Paradisi rosa,
Tua prece omnia

Spernam vitiosa
Et tecum in gloria

Vivam gaudiosa.

11. Ave, digna laudibus,

Sancta Radegundis,
Nam spretis regalibus

Satanam confundis,
Piis leva precibus

Culpae de profundis
Me et caeli coetibus

Socia iucundis.

12. Ave, Clara nomine,

Clarior virtute,
In Francisci ordine

Claro degens tute,
Pio da iuvamine

Scutum pro me tu te,
Ut in poli lumine

Regnem cum salute.

13. Ave, stirpis regiae

Dulcis Magdalena,
Illustravit gratiae

Te divinae vena,
Ora, ne nequitiae

Me liget habena,
Sed da caeli curiae

Gaudia amoena.