QUAESTIO V.

Utrum in Circumcisione conferebatur gratia ?

Alens. 4. part. quaest. 7. membro 7. D. Thomas 3. part. quaest. 70. art. 4. D. Bonavent. hic 2. part. art. 1. quaest. 3. Richard. art. 6. quaest. I. Gabriel. quaest. 4. Durand. quaest. 5. Aureol. quaest. 2. art. 4. Rubion. quaest. 5. Major ibid. Suarez tom. 3. part. 3. disp. 5. sect. I. Vasquez 3. pari. d. 165. Scotus inOxon . hic quaest. 6. etde I. princ. cap. 3

Arguitur quod non. Glossa super id ad Rom. 4. Signum Circumcisionis ; et habetur in littera hujus distinctionis, cap. penult. in Circumcisione peccata tantum remittebantur, sed non gratia ad bene operandum praestabatur, nec virtutes augebantur, nec dabantur, sed tantum signabantur.

Item, Circumcisio non conferebat nisi quod signabat ; sed non signabat nisi peccati remissionem ; ergo illud tantum conferebat.

Item, secundum Magistrum et ponitur in littera, Sacramenta veteris legis tantum promittebant gratiam ; Sacramenta novae legis causant, quod illa promittebant ; ergo, etc.

Item, secundum Bedam in cap. 2. Lucae, et habetur in littera: Circumcisio non aperuit januam ; gratia aperuit, quia non datur alicui, nisi quis sit acceptus et amicus Dei ; ergo, etc.

Contra multipliciter in littera, et de Consecr. dist. 4. August. de nupt. et concup. cap. 11. Ex quo instituta est Circumcisio in populo Dei, magnis et parvis valebat ad purgationem originalis peccati, sicut Baptismus, ex illo tempore quo institutus est, incipiebat valere ad innovationem hominis; sed per Baptismum non tantum remittebatur culpa, sed etiam conferebatur gratia ; ergo et in Circumcisione gratia conferebatur.

Item, Beda in littera: Quia nunc per Evangelium suum, etc.