QUAESTIO II.

Utrum baptizati Baptismo Joannis tenebantur de necessitate salutis iterum baptizari Baptismo Christi.

Alens. 4. p. q. 9. m. 7. D. Thom. 3. p . q. 38. art. 6. et q. 66. art. 9. D. Bouav. hic a. 2. q. 3. Richard. art. 2. g. 4. Durand. q. 4. Gabr. q. 2. Bellarm. l. i. de Baptismo. cap. 20. et sequent. Abul. in 3. Matth. q. 30. Scot. in Oxon. hic. q. 2.

Arguitur quod non. Magister in littera hujus distinctionis, cap. ultimo : Qui spem non posuerunt in Baptismo Joannis, et in Patrem et Filium et Spiritum sanctum credebant, non erant baptizandi postea, sedper impositionem manuum Apostolorum super eos acceperunt Spiritum sanctum.

Item, in receptione Sacramentorum quod datur non est iterandum, sed si aliquid omittitur, caute est supplendum ; exemplum de Clerico per saltum promoto ; ergo cum in Baptismo Joannis daretur ablutio exterior, et non interior, videtur quod in Baptismo Christi jam instituto non fuerit ablutio exterior iteranda, sed interior supplenda.

Contra, de consecrat. d. 4. c. Aliud, et habetur apud Augustinum, hom. 5. super Joan. Si quos baptizavit Judas, non sunt iterum baptizandi, si quos Joannes, iterum baptizandi sunt.

Item, Augustinus lib. 5. contra Donatistas,-ante medium: Dominus Jesus tali Baptismo mundat Ecclesiam, quo accepto nullum aliud requiritur, accepto tamen Joannis Baptismo, adhuc erat dominicum Baptisma necessarium.