Scholium.

Ait Baptismum prius fuisse sub consilio, et postea sub praecepto, sed non ante Pentecosten. Ita cum Scoto Aureolus, Rubion, Gabriel citati. et Suarez 3. p. tom: 3. d. 27. contra D. Thomam dist. I. art. 2. et I. 2. q. 1C3. art. 3. et Thomietas asserentes totam legem novam

Obligasse a morte Christi. Addit deinde Doctor discipulos baptizasse ante Christi mortem Baptismo Christi, et non Joannis. Constat, Joan. 3. et Lucae 4. et habetur cap. Aliud, de consecrat. d. 4. Ita August. tract. 11. et 13.in Joann. D. Bonav. 3. p. art. I. quaest. I. et alii. Tertio assignat Doctor rationem quare non fuit promulgatas Baptismus immediate post ejus institutionem.

In ista quaestione videnda sunt tria : Primum, quod sola institutio Baptismi non obligavit homines de necessitate salutis ad ejus susceptionem. Secundum, quod ejus promulgatio obligavit eos, quibus promuI-gabatur ad ejus susceptionem. Tertium est de comparatione Baptismi ad evacuationem Circumcisionis.

Quantum ad primum, scilicet quod sola ejus institutio antequam promulgaretur, non obligabat hominem ad ejus susceptionem ; probatur, quia dictum est Salvatoris Joann. 13. Si non venissem, et eis locutus non fuissem, peccatum non haberent, quod sic intelligo : Si Christus nec per se, nec per suum authenticum, de quo fuissent certi ex facto vel miraculo, vel ex forma, ut testimonio bonorum, et fide dignorum eis locutus fuisset, peccatum non haberent incredulitatis.

Ex isto accipio istam propositionem : Christus non vult aliquem obligare ad legem aliquam firmiter observandum, nisi promulgatam ab eo, vel ab aliquo authentico nuntio, de quo constat certitudinaliter quod est servus ejus ab eo missus, quia non tenetur quis recedere a lege priore justa, et a Deo instituta, propter quaecumque signa, sed propter signa certa et authentica, quod ista sit revocata, quia qui cito credit, levis est corde, Eccl. 19. Sed institutio Baptismi non fuit ejus promulgatio, quia quando illud primo instituit Christus, nec ipse, nec aliquis servus illius authenticus ipsam divulgavit, ut patet, Joan. 3. ergo institutio ejus nullum obligavit ad ejus susceptionem.

Quantum ad tertium de ejus promulgatione dico, quod promulgatio ejus fuit duplex: Una per modum consilii, ut quando praedicabatur ab Apostolis, Christo adhuc vivente ante ejus passionem. Patet Joann. 3. Venit Jesus et discipuli ejus in Judaeam, et illi baptizabant, etc. Luc. 4. Misit illos binos et binos ad praedicandum et baptizandum, et tunc nullos ad hoc obligavit. Cujus probatio est secundum aliquos, quia Circumcisio imponebatur Judaeis ex necessitate salutis usque ad Passionem Christi, sicut et omnia alia legalia, nam Christus ante mortem suam immediate comedit agnum Paschalem, et non fecisset, nisi Sacramenta illius legis usque tunc habuissent efficaciam. Unumquodque enim manet ita diu, sicut habet efficaciam ; ergo Circumcisio usque tunc mansit. Non ergo necessario tenebantur homines ad Baptismum, quia contra idem non sunt duo remedia totalia, quia altero istorum non existente, nihil minus habetur etiam remedium totale per aliud, sed quo non existente nihil minus curatur aliquid aliud, non est necessarium remedium, nec efficax respectu ejus ; ergo idem simul esset utrumque necessarium et efficax, et non efficax. Istud de Circumcisione quod cadebat sub praecepto de necessitate salutis usque ad Passionem Christi, non credo esse verum, sicut dicetur infra.

Et si quaeras quare non fuitstatim Baptismus promulgatus post ejusinstitutionem? dicendum quod duplici de causa hoc factum fuit ; tum quia lex justa a Deo tradita sanctis Patribus, non debet subito in adventu novae legis conditae revocari, ne inutilis vel contemptibilis eam observantibus videretur; tum quia lex nostra, quae est ardua et perfecta, non debet principaliter sub praecepto statim institui, sed cum debita maturitate hominibus prius ad eam aliqualiter assuefactis debet tradi. Et ideo sepelienda erat Synagoga Judaeorum cum honore et reverentia debita propter scandalum et indignationem illius populi carnalis et rudis ad ardua et spiritualia capiendum.

Credo enim illam legem rudem in victimis et holocaustis eis fuisse convenientem magis quam legem nostram, quia populus rudis erat, et pronus ad idololatriam.

Secunda causa, quia scilicet promulgatio Baptismi fuit per modum praecepti, quae, ut credo, incepit in die Pentecostes, quando Apostoli accepto Spiritu sancto in linguis igneis, praedicabant verbum Dei, ita quod quisque audiebat eos loqui in lingua, in qua natus erat, et appositae sunt animae circa tria millia, et baptizati sunt Act. 2.