Thomas Aquinas, In III Sententiarum – In Libros Sententiarum

Ulterius. Videtur, quod haec sit vera: filius dei praedestinatus est simpliciter. Sicut enim praedestinatus importat effectum temporalem; ita mittitur et datur. Sed conceditur quod filius dei est missus et datus. Ergo etiam debet concedi quod filius dei est praedestinatus.

Argumentum 2

Praeterea, in aliis qui sunt praedestinati ad vitam aeternam, non oportet quod addatur ad quid praedestinati sunt; sed sufficit eos dicere esse praedestinatos.

Sed filius dei est praedestinatus esse homo. Ergo filius dei debet dici esse praedestinatus simpliciter.

Argumentum 3

Praeterea, in christo non est nisi unum suppositum.

Sed de illo supposito potest dici simpliciter, quod sit praedestinatum: dicitur enim, quod homo est praedestinatus. Ergo potest filius dei esse praedestinatus.

Sed Contra 1

Sed contra, aeternum non praedestinatur. Sed filius dei est aeternus. Ergo non est praedestinatus.