Articulus 2C

Argumentum 1

Ulterius. Videtur quod actus fidei habeat minorem certitudinem quam actus scientiae. Quia, ut dicit Hugo de sancto victore, fides est certitudo de absentibus, infra scientiam, et supra opinionem. Ergo sicut fides est certior quam opinio, ita est minus certa quam scientia.

Argumentum 2

Praeterea, certius est quod est dubitationi impermixtius, sicut albius est quod est nigro impermixtius.

Sed ea quae sunt scita, nullo modo possunt habere dubitationem; ea autem quae sunt credita, possunt habere aliquem motum dubitationis salva fide. Ergo fides non habet tantam certitudinem sicut scientia.

Argumentum 3

Praeterea, omnis certitudo nostrae cognitionis procedit ex visione sensus, vel ex visione intellectus.

Sed fides est de his quae non videntur a sensu neque intellectu. Ergo fides non habet aliquam certitudinem, ut videtur.

Sed Contra 1

Sed contra, Augustinus dicit, quod nihil est certius homini sua fide.

Sed Contra 2

Praeterea, quanto ratio quae facit fidem, firmior est, tanto fides est certior. Sed scientiam facit ratio humana, quae in infinitum deficit a ratione divina, quae fidem facit. Ergo fides est multo certior quam scientia.