Articulus 1C

Argumentum 1

Ulterius. Videtur quod fidei possit subesse falsum. Omne enim verum contingens potest esse falsum. Sed fidei subest aliquod verum contingens, scilicet passio christi, quia fuit voluntaria, et ex libero arbitrio tam christi quam Judaeorum dependens.

Ergo fidei potest subesse falsum.

Argumentum 2

Praeterea, in tempore ante passionem christi postquam credidit Abraham christi passionem futuram, constat quod possibile fuit tunc deo alio modo humanum genus liberare: quod si fuisset, fides Abrahae falsificata fuisset. Ergo fidei potest subesse falsum.

Argumentum 3

Praeterea, spei potest subesse falsum: quia aliquis sperat se habiturum vitam aeternam qui nunquam habebit: et similiter caritati: quia aliquis promittit aliquid ex caritate quod non faciet, sicut de apostolo patet 1 Cor. 1. Ergo et fidei.

Argumentum 4

Praeterea, latria per fidem dirigitur. Sed in actu latriae aliquis potest errare, sicut qui credit esse hostiam consecratam quae non est consecrata, et eam adorat. Ergo et fidei potest subesse falsum.

Sed Contra 1

Sed contra, fides est certior quam scientia, ut supra dictum est. Sed scientiae non subest falsum.

Ergo multo minus fidei.

Sed Contra 2

Praeterea, per nullam virtutem producitur actus malus: quia bonus usus potentiae est actus virtutis, ut dicit Augustinus.

Sed opinari falsum est malus usus intellectus. Cum ergo fides sit virtus, non contingit fidei subesse falsum.