Thomas Aquinas, In III Sententiarum – In Libros Sententiarum

Ulterius. Videtur quod diligat plus hominem quam Angelum. Quia nusquam Angelos apprehendit, sed semen Abrahae apprehendit; Hebr. 2, 16; et sic plus fecit pro hominibus quam pro Angelis.

Ergo magis diligit eos.

Argumentum 2

Praeterea, homines pluribus modis sunt membra christi quam Angeli, scilicet quantum ad conformitatem naturae. Sed membra christi magis diligit, ut in littera dicitur. Ergo homines plus diligit quam Angelos.

Argumentum 3

Praeterea, homines supra Angelos collocavit, scilicet christum, et beatam virginem. Ergo plus homines Angelis diligit.

Sed Contra 1

Sed contra, dilectio causatur ex convenientia amantis cum amato. Sed Angeli sunt similiores deo, ut dicit Gregorius Lib. 32 Moral..

Ergo Angelos plus diligit.

Sed Contra 2

Praeterea, Angelis in principio gratiam vel quasi gloriam contulit; non autem hominibus. Ergo Angelos magis hominibus diligit.