Articulus 3C

Argumentum 1

Ulterius. Videtur quod timor castus diminuatur caritate crescente. Timor enim initialis et castus, ut probatum est, sunt idem secundum substantiam.

Sed timor initialis decrescit caritate crescente, ut in littera dicitur. Ergo et timor castus.

Argumentum 2

Praeterea, omnis timor habet poenam, ut dicitur 1 joan. 4. Sed caritas perfecta non habet poenam. Ergo quanto crescit caritas, tanto quilibet timor decrescit.

Argumentum 3

Praeterea, ubi est impossibilitas separationis, ibi non est timor separationis. Ergo quanto aliquis difficilius separatur a deo, tanto minuitur separationis timor. Sed quanto caritas magis crescit, tanto aliquis difficilius a deo separatur, quia strictius ei colligatur. Ergo quanto magis crescit caritas, tanto magis decrescit separationis timor, qui dicitur castus.

Sed Contra 1

Sed contra, timor castus est donum spiritus sancti. Sed omnes virtutes et dona simul crescunt, sicut et simul infunduntur. Ergo crescente caritate, crescit timor castus.

Sed Contra 2

Praeterea, amor est timoris causa. Sed crescente causa crescit effectus. Ergo caritate crescente crescit timor.