Articulus 3B

Argumentum 1

Ulterius. Videtur quod hanc scientiam christus habuit minorem Angelis. Quia quanto intellectus est simplicior, tanto ejus naturalis scientia est major. Sed intellectus angelicus est simplicior quam anima christi: quia intellectus christi non excedit terminos humanae naturae, ultra quos est simplicitas intellectus angelici. Ergo intellectus angelicus habet majorem scientiam quam est scientia naturalis animae christi.

Argumentum 2

Praeterea, quanto intellectus est magis propinquus materiae, tanto est debilior in cognoscendo.

Sed intellectus christi, cum sit forma materialis corporis christi, est magis propinquus materiae quam angelicus. Ergo debilius cognoscit; et sic idem quod prius.

Argumentum 3

Praeterea, sicut dicit Isaac, ratio oritur in umbra intelligentiae. Intelligentiam autem vocat Angelum. Cum ergo christus habeat intellectum rationalem, videtur quod ejus scientia sit minor quam Angelorum.

Sed Contra 1

Sed contra, Hebr. 2 dicitur, quod christus minoratus est ab Angelis solum propter passionem.

Ergo scientiam habet eis potiorem.

Sed Contra 2

Praeterea, sicut dicit dionysius, ipse christus secundum quod homo, docet Angelos. Ergo majorem scientiam habet quam illi.