Articulus 1A

Argumentum 1

Ad primum sic proceditur. Videtur, quod non debuerit aliquem sexum accipere. Quia ipsum corpus christi verum praesignat corpus mysticum.

Sed in corpore mystico, quod est ecclesia, non est differentia sexuum: quia, sicut dicit apostolus Galat. 3, 28, in christo non est masculus neque femina. Ergo nec ipse sexum assumere debuit.

Argumentum 2

Praeterea, sexus ordinatur ad generationem carnalem. Sed christus non venerat ut esset principium humani generis per generationem carnalem, sed spiritualem. Ergo sexum sumere non debuit.

Argumentum 3

Praeterea, spiritus creatus indifferenter se habet ad utrumque sexum. Sed plus distat spiritus increatus a differentia sexuum quam spiritus creatus.

Ergo ipse deus se habet indifferenter ad utrumque sexum. Ergo vel utrumque assumere debuit, vel neutrum.

Sed Contra 1

Sed contra, christus debuit fratribus assimilari quantum ad naturalia, ut dicitur Hebr. 2. Sed sexus est de naturalibus hominis. Ergo debuit sexum assumere.

Sed Contra 2

Praeterea, quod est inassumptibile, est incurabile, ut dicit Damascenus.

Sed sexus praecipue curatione indigebat, in quo maxime peccatum originale regnat. Ergo debuit assumere sexum.