Articulus 2C

Argumentum 1

Ulterius. Videtur quod gratia singularis personae praecedat gratiam unionis. Quia gratia singularis personae facit ad congruitatem unionis. Sed anima, quae facit ad congruitatem unionis corporis, prius intelligitur uniri corpori quam ipsa unita ad invicem intelligantur uniri divinae personae.

Ergo similiter prius etiam secundum intellectum est gratia singularis in natura humana quam gratia unionis.

Argumentum 2

Item, videtur quod sit prius gratia capitis. Quia prius consideratur aliquid in se perfectum quam alteri perfectionem largiens. Sed gratia singularis est qua in se perfectus est; gratia autem capitis secundum quam perfectionem alteri largitur. Ergo gratia singularis est prior quam gratia capitis.

Argumentum 3

Item, videtur quod gratia unionis sit prior quam gratia capitis. Quia ex hoc est caput quod justificat. Sed per fidem incarnationis justificat, ut supra dictum est. Ergo incarnatio praecedit gratiam capitis.

Argumentum 4

Sed contra, gratia capitis operata est ante incarnationem; non autem gratia unionis, nec gratia singularis personae. Ergo gratia capitis est prior illis duabus.

Argumentum 5

Quam gratia singularis. Quia ex hoc quod fuit unigenitus a patre, fuit plenus gratia et veritate.

Sed unigenitus a patre fuit per gratiam unionis.

Ergo gratiam singularis personae habuit per gratiam unionis; et sic illa est prior.