Articulus 2B

Argumentum 1

Ulterius. Videtur quod ascensionis motus fuerit subitus. Quia Augustinus dicit in quaestionibus de resurrectione, quod tales sunt motus corporum glorificatorum, sicut motus radii solis. Sed motus radii est in instanti. Ergo et motus corporis christi gloriosi.

Argumentum 2

Praeterea, corpus christi gloriosum, omnino erat subjectum voluntati spiritus. Sed voluntas in instanti potest moveri de loco ad locum. Ergo et corpus christi glorificatum.

Argumentum 3

Praeterea, potentia corporis christi glorificati est improportionabilis potentiae alicujus corporis mobilis non glorificati. Sed secundum proportionem virtutis moventis est proportio temporis in quo fit motus: quia major virtus in minori tempore movet. Ergo si aliqua virtus movet in tanto tempore, virtus corporis christi glorificati movebit in instanti ipsum corpus, quod instans tempori non proportionatur.

Sed Contra 1

Sed contra, corpus christi, cum sit divisibile, habet partem post partem. Sed ubi est una pars, ibi non est alia. Ergo oportet quod parti succedat pars: ergo motus ille non est subito.

Sed Contra 2

Praeterea, motus subitaneus non potest percipi.

Sed apostoli viderunt christi ascensionem. Ergo non fuit subita.