Thomas Aquinas, In III Sententiarum – In Libros Sententiarum

Ulterius. Videtur quod magis diligat poenitentem quam innocentem: quia gaudium ex amore consequitur. Sed plus gaudet de poenitente, ut patet Luc. 15. Ergo plus eum amat.

Argumentum 2

Praeterea, ubi homo magis operatur, magis diligit: propter quod, ut philosophus dicit 9 ethic., matres plus diligunt filios quam patres.

Sed deus plus operatur ad salutem poenitentis quam innocentis. Ergo plus eum amat.

Argumentum 3

Praeterea, affectus amoris ex effectu pensatur.

Sed major amoris effectus videtur revocare inimicum ad amicitiam, quam amicum in amicitia conservare.

Ergo plus diligit poenitentem quam innocentem.

Sed Contra 1

Sed contra, quod est diuturnius, est magis eligendum et diligendum. Sed bonum innocentis est diuturnius. Ergo magis diligitur a deo.

Sed Contra 2

Praeterea, supra dictum est, dist. 31, qu. 1, art. 10, quod resurgens nunquam redit ad tantam dignitatem, quamvis redire possit ad tantam caritatem.

Ergo deus plus diligit innocentem quam poenitentem.