Articulus 4E

Argumentum 1

Ulterius. Philosophus in 5 ethic., dividit justitiam in legalem et specialem, quae est aequalitas quaedam in bonis et malis exterioribus: quam dividit in distributivam et commutativam.

Dividit etiam justum in politicum, paternum, et uxorium; politicum autem in legalem et naturalem.

Ponit etiam circa justitiam, epiceiam et justitiam metaphoricam. Et videtur quod male. Species enim non debet dividi contra genus. Sed justitia particularis est species justitiae legalis. Ergo non debet dividi contra eam.

Argumentum 2

Praeterea, justitia dirigimur in his quae ad alterum sunt. Sed omnis operatio unius ad alterum commutatio quaedam est. Ergo justitia commutativa non debet poni pars justitiae specialis, sed idem ei.

Argumentum 3

Praeterea, justum politicum videtur ad justitiam legalem pertinere. Ergo non debet poni pars justitiae specialis.

Argumentum 4

Praeterea, paternum et dominativum et uxorium non videntur differre nisi secundum materiam.

Ergo non debet distingui justum per praedicta.

Argumentum 5

Praeterea, epieicia, ut ipse dicit, est aliquid melius justitia. Ergo magis debet justitia poni pars ejus quam e converso.