Articulus 1B

Argumentum 1

Ulterius. Quaeritur, quis sit actus ejus in via. Et videtur quod non habeat unum actum.

Quia, sicut communiter dicitur, fortitudo exequitur in illis ad quae non omnes tenentur, in quibus etiam consilium dirigit, sicut sunt opera supererogationis.

Sed haec non possunt reduci ad unum actum secundum speciem, cum hujusmodi opera fere secundum omnes virtutes inveniantur. Ergo fortitudo non habet unum actum secundum speciem.

Argumentum 2

Praeterea, Gregorius dicit, quod spiritus fortitudinis est miraculis et doctrina fulgere. Sed haec duo sunt diversa genera et ad invicem, et ad alios actus, qui dono fortitudinis assignantur. Ergo idem quod prius.

Argumentum 3

Praeterea, Augustinus dicit in Lib. De doctrina christiana, ubi loquitur de donis, quod fortitudinis est ab omnium transeuntium mortifera jucunditate seipsum sequestrare.

Gregorius autem dicit, quod fortitudo circa adversa fiduciam dat trepidanti.

Sed haec duo non reducuntur ad unum genus, cum unum videatur pertinere ad materiam temperantiae, aliud autem ad materiam fortitudinis, vel patientiae. Ergo videtur quod non habeant unum actum.

Sed Contra 1

Sed contra, habitus distinguuntur per actus.

Sed fortitudo donum est unus habitus. Ergo habet unum actum.

Sed Contra 2

Praeterea, donum est simplicius quam virtus, cum sit sublimius. Sed fortitudo virtus habet unum actum principalem, scilicet sustinere pericula propter bonum. Ergo multo fortius donum fortitudinis habet unum actum.