190 Acta Apostolicae Sedis - Commentarium Officiale

mensis Iunii anno 2003, in festo quod ad oram piscinae peragebatur pueruli

vacatio repente animadversa est, quem mater et qui aderant omnes circum

undique magno referti timore requisiverunt. Qui autem, quinque horae iam

transactis momentis, iure veriti, ne puer in aquam perniciose delapsus es-

set, piscinam attentius inspexerunt, ubi revera parvulum iamiam funditus

subsessum invenerunt et, pulsu cordis afflatuque respirationis absentibus,

pallore pervasum ex imo deprompserunt. Suspirio in os de ore cordisque

externa suppeditatis frictione, quinque aliis modo momentis temporis post

corporis inventionem praeteritis levia puer anhelitus ostendere cepit acta,

quapropter in valetudinarium pro primis curis ministrandis advectus est ac

dein in loculamentum alius clinicae intensivis curationibus sepositum, ubi

medici eum magno in discrimine vitae protestati sunt ac diagnosim dixerunt

quoad valetudinem gravissimam.

Tantis in saevis adiunctis, parentes ad divinum confugere statuerunt

auxilium, iisdem Sororibus Oblatis Sacratissimi Cordis Iesu in oratione con-

sociatis, quae scholam maternam a puerulo frequentatam administrabant;

quarum aliquae, ipso sero vespere diei 25 mensis Iunii anno 2003, propere

valetudinarium petierant, ut parentibus pueri tanto in angore adessent,

et protinus per Venerabilis Servae Dei intercessionem Deum pro vita et

salute pusilli invocare coeperunt. Postridie corona quasi orationum sponte

cumulata est, quae communitatem paroecialem conexuit et ad Sorores Obla-

tas universae Italiae pervasit. Interdum imaguncula quaedam cum effigie

Matris Mariae Teresiae ad pulvinum infirmuli collocata est. Et feria sexta

diei 27 mensis Iunii, in sollemnitate Sacratissimi Cordis Iesu, dum Sancta

Missa in sacello Sororum Oblatarum celebrabatur, hora fere septima post

meridiem, infra biduum a metuendis rebus actis, pueri condiciones adeo

visae sunt palam proficere, ut a comatis lethargo expergisceretur atque

brachia et crura moveret. Mane sabbati 28 mensis Iunii infirmus ergo e

tubulis ad perflationem auxiliandam expeditus est, insequenti die dominica

manducare valuit et die 30 mensis Iunii iam e valetudinario dimissus est.

Continuatio temporis clarissime patuit, sicut et nexus inter invocationem

Venerabilis Servae Dei et pueri sanationem, qui exinde adolescere perse-

veravit optima gaudens valetudine, nullo omnino superstite in systemate

nervorum effectu.

De hac mira habita sanatione apud Curiam Episcopalem Youngstonien-

sem a die 13 mensis Decembris anno 2007 ad diem 19 mensis Martii anno