192 Acta Apostolicae Sedis - Commentarium Officiale

TZANEENSIS

Beatificationis seu Declarationis Martyrii Servi Dei Tshimangadzo Samuelis Bene-

dicti Daswa (Bakali) Christifidelis Laici et Patrisfamilias († 1990)

DECRETUM SUPER MARTYRIO

« Omnis ergo qui confitebitur me coram hominibus, confitebor et ego

eum coram Patre meo qui in caelis est » ( Mt 10, 32).

Animam dare pro Iesu Christo, difficultatibus vitae posthabitis, summum

christifidelium privilegium constituit. Huiusmodi autem testimonium Servus

Dei Tshimangadzo Samuel Benedictus Daswa, vulgo Bakali nuncupatus,

in familia et in publica communitate usque ad extremum vitae praebuit.

Immo claritate atque honestate vitae probatus, primus Servus Dei exstat

ex Africae Meridionalis Republica, cuius mortale certamen, pro fide chris-

tiana passum, pervulgatam evocat diram tabem superstitionis, seu vulgo

stregoneria, nostris temporibus adhuc perdurantem.

Primogenitus ex coniugibus non christianis Tshililo Petro Daswa et Thi-

dziambi Ida Daswa, Servus Dei die 16 mensis Iunii anno 1946 in pago vulgo

Mbahe, nunc in provincia Limpopensi intra fines regionis, vulgo Transwaal,

in Africa Australi natus est. Die 21 mensis Aprilis anno 1963 ad regeneratio-

nis fontem ductus est atque die 21 mensis Iulii eiusdem anni sacramentum

confirmationis recepit.

Studiis scholarum primariae, secundariae necnon professionalis peractis,

Dei Servus anno 1973 titulum magistri elementaris adeptus est et opus

institutionis apud scholam primariam loci vulgo Ha-Dumasi incepit. Anno

1974, iuxta mores gentis, vulgo Lemba, cum Evelina Shadi Monyai, fidei

luteranae adscripta, unionem de facto inivit. Die autem 28 mensis Novembris

anno 1978, matrimonium ad normam iuris civilis confirmatum fuit. Prima

autem die mensis Ianuarii anni 1979 Dei Servus moderator principalis scho-

lae elementaris vici vulgo Nweli factus est et cum Evelina, in catholicam

fidem recepta, die 9 mensis Augusti anno 1980 sacramentum matrimonii

celebratum fuit. Ex convalidato matrimonio octo filii suborti sunt.

Exinde vita quotidiana Servi Dei, sub moderatione et auxilio Patris Patri-

cii O'Connor, e Congregatione Missionariorum Sacratissimi Cordis Iesu, nova

eluxit claritate. Homo enim pietatis enixior illinc factus propter diuturnam