5. De sancto Aegidio.

In 1. Vesperis.

Ad Magnificat.

O quam miranda est

potentia salvatoris

In meritis beati

Aegidii confessoris,

Qui apud Deum et homines

dignus memoria

Cum sanctis iam aeterna

tripudiat in gloria.

Ad Matutinum.

Imitatorium.

O comites vitae,

Dominum meditando venite,

Aegidii meritis

sic similes eritis.

In 1. Nocturno.

Antiphonae.

1. Beatus Aegidius,

Natione Graecus,

Nobilis erat progenie,

Sed nobilior sanctitate.

2. Traditus igitur

Liberalibus studiis

Memoriter coepit viam

Indagare veritatis.

3. Quadam die

Pergens ad ecclesiam

Cuidam aegroto

Tradidit tunicam suam.

Responsoria.

1. Beatus Aegidius

Per divinam potentiam

Sanavit miserum quendam,

Qui a serpente percussus

Mortiferam

In se habuit virus.

V. Misericordia motus

super illum

Sanavit eum ac dimisit.

2. Sanctus vir Aegidius

Magnam fiduciam

Habens in Domino

Liberavit quendam pauperem

Arreptum a daemonio.

V. Daemon clamans

Et multum discerpens

Discessit ab eo.

3. Sanctus Aegidius

Inter alia terrae

Pellens sterilitatem

Infirmo cuidam

Totius corporis

Reddidit sanitatem,

V. Recolens illud, quod dicitur:

Quis infirmatur

Et ego non infirmor?

In 2. Nocturno.

Antiphonae.

1. Secuta est ergo

pietas pietatem,

Quia dum aeger ille

indutus est tunica,

Totius corporis meruit

recipere sanitatem.

2. Sanctus vir Aegidius

Navim ingressus

Applicuit ad Marsiliam

Et inde ad Arelatem

Ibi Caesarium quaerens,

Caesarium sitiens

Caesarium adivit episcopum.

3. Sicut socrum Petri

Febricitantem

Sanavit Dominus,

Sic ibi cuiusdam

Viduae filiam

A febre liberavit

Aegidius.

Responsoria.

1. O quam praeclara duo

Mundi convenere

Luminaria,

Aegidius et Veredemius,

Signa insimul operantes

Multifaria

V. Et seminaverunt agros

Et plantaverunt vineas.

2. Veredemium ergo

Corpore non mente

Relinquens

Desertum petivit,

Ubi herbis et aqua

Contentus

Solus soli Domino

Servivit.

V. Qui per corvum

Pascebat

Eliam

Ipse Aegidium

Reficiebat

Per cervam.

3. Sanctissime Christi

Confessor Aegidi,

Ora pro nobis

In conspectu Domini,

Ut de praeteritis

Malis veniam

Et de futuris

Semper mereamur

Habere custodiam.

V. Qui arborem virtutum

ascendisti cum Zachaeo,

Pro supplicibus tuis

dignanter supplica Deo.

In 3. Nocturno.

Antiphonae.

1. Beatus Aegidius

Adiunctus est cuidam

Veredemio,

Sanctus sancto,

Ut sanctitas alterius

Cognosceretur.

2. Vir non modicae

In Christo fidei

Ostia Romae

Sibi tradita commisit

Tiberique

Ad monasterium patris

Quasi Petri per mare

Ferebatur vestigiis.

3. Serve Dei vivi,

miserorum pastor, Aegidi,

Nunc, pius exaudi,

quod nos canimus tibi laudi.

Responsoria.

1. Iam Dominum laudet,

qui se pie vivere gaudet,

Ut pater hic vixit,

qui mundo se crucifixit ;

V. Dives enim

pauper fuerat,

Moriens cotidie

Domino vivebat.

2. Vox clamantis erat

sibi, dum deserta petebat,

Ingrediendo vias

eremi velut alter Elias,

V. Associatus ei,

qui fons pius est requiei.

3. Moribus uniti

vos verae iungite viti,

Ut pater hic suevit,

qui mundi gaudia sprevit,

Fructiferae vitis

odor ut per saecula sitis,

V. Pacis tranquillae

sitientes gaudia mille.

In Laudibus.

Antiphonae.

1. Rex Francorum Karolus

Quoddam perpetravit facinus,

Quod nulli dicere ausus

Sancti Aegidii

commendavit precibus.

2. Beato Aegidio

pro Karolo rege

Inter missam

supplicante Domino

Peccatum regis et venia

peccati per cartulam

Delata est ab angelo.

3. Adiunctum erat

in fine cartulae,

Quod sancti Aegidii

meritis quilibet

Peccator absolvatur

a crimine,

Si ulterius non vult

admittere.

4. Sanctus vir Aegidius

Ad Karolum iens

Daemorriacum sanavit,

A Karolo rediens

Cuiusdam principis filium

A morte resuscitavit.

5. O virum per omnia

laudabilem

Et cunctis se invocantibus

exorabilem,

Qui ex antiquo hoste Deo gratam

De se referens victoriam

Hodierna die perpetuam

Transivit ad gloriam.

Ad Benedictus.

A. Ante thorum regis

sanctorum iuncte choreis,

Associando tibi

superis nos confer, Aegidi,

Simus ut haeredes,

ubi viti palmes inhaeres.

In 2. Vesperis.

Ad Magnificat.

A. Laus immensa Dei

sunt huius festa diei,

In qua Graccorum

flos scandit ad alta polorum

Inclitus Aegidius,

quia dulcia vota per eius

Vincula rumpuntur,

tempestates reprimuntur,

Sedantur morbi

totique salus datur orbi.