87. De sancta Dympna.

In 1. Vesperis.
Antiphonae.

1. Sacro felix germine
Laetetur Hibernia,
Cuius floret sanguine
Iubilans Antwerpia.
2. Regis nata laudibus
Efferatur dignis,
In his nationibus
Potens et insignis.
3. Velut inter nebulas
Stella matutina
Christianae splenduit
Legis disciplina.

4. Patris ob insaniam
Et amorem Dei
Veniens Antwerpiam
Se placentem hostiam
Mundam libat ei.

5. Ne nos premat Aegyptius,
Qui mergi mares imperat,
Reduc, martyr, in melius,
Quod te laudantes onerat.

Ad Magnificat.

A. Beata, quae metuit
Metu filiali

Christum, dum praeposuit
Regno temporali
Nec consensu mali

Regis voto paruit,

Ideo nunc adfluit
Gloria spiritali.

Ad Matutinum,
Invitatorium.

Iubilemus hodie
Salvatoris nomini,

Qui palmam victoriae
Dympnae dedit virgini.

In 1. Nocturno.
Antiphon ae.

1. In magnificentia
Dei super caelos
Dympna regis filia
Laudum profert melos.
2. Aspernendo saeculuin
Cum insigni prole
Suum tabernaculum
Posuit in sole.

3. Mente pura, munda corde
Innocens et manibus
Inquinari stupri sorde
Totis obstat viribus.

Responsoria.

1. Ortus in Hibernia
Floret in Antwerpia
Puritatis flosculus,
Cuius vigil oculus ;
V. In honore conditam
Avis huius semitam
Ignoravit regulus.
2. A beato Gereberno
Baptizatur iam materno
Privata solamine
Virgo Dympna nomine,
V. Idolorum vanos ritus
Detestatur penitus

Sancto fervens flamine.

3. Suo phoenix tempore
Portavit in corpore
Iesu Christi stigmata
Spernens ortus stemmata,
V. Frequens mente memori
Recondebat pectori
Sacrae legis dogmata.

In 2, Nocturno.
Antiphonae.

1. Omnis decor filiae
Regis est ab intus,
Ramos extendens gratiae
Quasi terebinthus.
2. Haec regio saepta munimine
Nullo potest vinci tentamine,
Cuius pater in fortitudine
Turbatus est amaritudine.
3. Mundum, carnem, daemonium
Quia vicit in stadio,
Ecce, sicut laetantium
Est omnium
Illius habitatio.

Responsoria.

1. Quasi stellis
luna lucidior,
Verbo potens

et actu fortior,
Contemptu fit
mundi nobilior,
V. Forma decens

aspectu pulchrior.
2. Tanto captus a decore
Delectatur in amore
Visae pulchritudinis
Incentor libidinis,
V. Promittens divitias
Aspirat ad nuptias
Venerandae virginis.
3. Virgo metu

nec dono frangitur,
Non oboedit
et non obsequitur

Nisi Christo,
cui committitur,
V. Corde credit

et ore loquitur,
Nullo cedit,
a nullo vincitur.

In 3. Nocturno.
Antiphonae.

1. Dympnae sanctimonia
Fuit pulchritudo,
Quam ditat in gloria
Vitae longitudo.

2. Eius in circuitu

Nubes nec caligo,
Sed in sancto spiritu
Tripudium,

Pax, dulcedo cordium
Lucis et origo.

3. Ad honorem nominis
Eius recensemus
Triumphum certaminis
Mirificum,

Novum laudis canticum
Domino cantemus.

Responsoria.

1. Vigor huius virginis
Nil distat ab hominis
Ausu iam admisso,
Quam nequit inflectere
Furor gentis miserae
Metu vel promisso ;
V. Bona coniugatio,
Rosa nubet lilio
Purpuraque bysso.

2. Tandem regnum
pro domo terrea
Passione

commutans rosea,
Genitoris

occumbit framea,
V. Rubens foris

et intus nivea.

3. Admiratur ratio
Martyris sub modio

Corpus vivens mortuum,
Cuius usum sensuum
Digitosque manuum
Restaurat oratio ;
V. Nobis in perpetuum

Per hanc sit excessuum
Nostrorum remissio.

In Laudibus.
Antiphonae.

1. Sanctam Dympnam Dominus
Induit decore,
Pro quo mundum respuit
Cum honorum flore.

2. Cordis cum laetitia
Domino servivit,
Cuius ad iustitiae
Portas introivit.

3. Tota mente fugiens
Carnis incentivum
Exquisivit sitiens
Deum, fontem vivum.

4. Vernans signis

et ope sedula,
Quem in terris

exaltant, singula,
Benedicit

eum in saecula.

5. Omnes terrae termini
Cum hac sancta Dei
Laudent nomen Domini
Iubilantes ei.

Ad Benedictus.

A. Festina, ne tardaveris

Nobisque, mater, miseris

Infunde rorem gratiae,

Ut carnis nostrae vitiis

Submersis cum Aegyptiis

Tecum fruamur requie.

In 2. Vesperis.

Ad Magnificat

A. Exsultans in filiis
Laudum cum obsequiis
Cordis ex laetitia
Alleluia
Consonet ecclesia ;

Dies est victoriae
Martyris eximiae,

Celebris memoria,

Alleluia

Consonet ecclesia)
Lapsus ergo criminum
Huius apud Dominum

Excusent suffragia,

Alleluia

Consonet ecclesia.