83. De sancto David.

In 1. Vesperis.

Ad Magnificat.

A. Ardens verbo, martyr voto,
Claustri nutritus moribus,

Purus virgo, corde toto
Intentus Dei laudibus,

David, piae melodiae
Es vere dignus vocibus.

Ad Matutinum.
Invitatorium.

Christo cantet ecclesia,
Qui ipsam sic ditavit,

Extollendo praeconia
Praeelari patris David.

In 1. Nocturno.

Antiphonae.

1. David simplex oculis
Vixit columbinis,
Iugis in fluentulis
Residens divinis.
2. Custos toto studio
Animae decoris
Nil curat de pallio
Vanitatis foris.
3. Formulat praecordiis
Puros cogitatus
Nec promit eloquiis
Steriles tractatus.

Responsoria.

1. Piorum pius filius

Parentum, David inclitus,
Ut stellae micans radius
Mores sectatur penitus,
V. Nunc sua dans hilarius,

Nunc sacris votis deditus.
2. Fit comes multum providus
Sanctae vitae claustralibus,
Qui mundo fuit splendidus
Auro, servis et opibus,

V, Perfectionis avidus

Dispersit haec pauperibus.

3. Ori obponens ostia

In frivolis obmutuit,
Aspectus et eloquia
Mulierum timuit,

V. Loquentes inutilia

Gravissime redarguit.

In 2. Nocturno.
Antiphonae.

1. Munda David praecordia
Virtutum clarent speculis,
Ut sint exemplaria
Magnis atque parvulis.

2. Est virtutum fundamentum
Et decor humilitas,
Ipsam sibi fulcimentum
David fixit sanctitas.
3. Dolet, flagrat, lacrimatur,
Suspirans ad martyrium,
Quando sibi nuntiatur
Sanctorum excidium.

Responsoria.

1. Amans cordis munditiam
Praerumpit cogitatus,
Adponit diligentiam
Per preces et ploratus,
V. Sic servat innocentiam

Christo confoederatus.
2. Sanctus David humilis,
Non timet opprobria,
Antiquo David similis
Hic eius est in patria,
V. Christum ducens in iubilis

Ad sui cordis atria.
3. Leo furit, ursus lingit,
Et Golias grandem fingit

Sibi fortitudinem,
Christi armis se praecingit
Sanctus David et confringit
Hanc tantam multitudinem.

V. In labore quidquid stringit,
Huius sancti non exstinguit
Amoris magnitudinem.

In 3. Nocturno.
Antiphoiiae.

1. Verbum serit, mortem quaerit
Clamans infidelibus,
Ut quiescant, resipiscant
Ab idolorum cultibus.
2. Solus orat nocte, rorat
Genas multis lacrimis
Pro novorum conversorum
Confortandis animis.

3. Elevatur, transformatur

In globum lucis splendidum,
Vere rarum tam praeclarum
Sancti privilegium !

Responsoria.

1. Affectans per martyrium
Suum augere meritum
Plagas, minas, auxilium
Non timet nec interitum;
V. Amoris stillicidium

Sic inebriat spiritum.

2. Invenit modos varios
Pacis et amicitiae,
Per quos multos nefarios
Lucrabatur ecclesiae,
V. Sic fortes operarios

Auxit Christo cotidie.
3. Pater David, stirpe clarus,
Vita iustus, arte gnarus,
Digna proles Angliae,
Cur venisti de remotis
In indoctis Suenis, Gotis
Viam vitae quaerere?
Vidi claras margaritas,
Licet luto delinitas,
Iacentes in pulvere,
V. Derelictis regno, patre,
Rebus caris atque matre
Has volebam emere.

In Laudibus.

Antiphonae.

1. Sanctum David decoravit
Larga Dei dextera
In tot signis fide dignis
Per virtutum opera.
2. Iucundetur, gratuletur
Tota terra Sueciae,
Sonant pie hierarchiae
Nunc caelestis curiae.

3. In praeclara caeli ara,
Deus, tecum vigilat
David, laetus et quietus
Te fruendo rutilat.
4. Astra, mundus, terrae fundus
Benedicant Dominum,
Qui tam bonum dat patronum
In salutem hominum.
5. Sit decora, sit sonora
Suenum laudatio
In insigni tam benigni
Sancti natalitio.

Ad Benedictus.

A. Ora, psalle, pater David,

Coram arca foederis,
Nos excusans, quos prostravit

Premens unda sceleris,
Ut salvati tibi demus

Laudum decem milia
Et viventes enarremus

Larga Christi magnalia.

In 2. Vesperis.
Ad Magnificat.

A. Christi templo conportavit

Aurum, aes et ebora,
Quae Sigfridus copulavit

Firma nectens ancora ;
Illius templi lapides

Aeterna Christi caritas
Nos iungat et vera fides

Ac almi David sanctitas.