62. De sancto Botuido.

In i. Vesperis.

Antiphonae.

1. Triumphantis militiae
Regem laudemus hodie,

Laudabilem in saecula,
Qui filiis ecclesiae
Militantis in acie

Nova confert solatia.

2. Regnum collaudat Sueciae
Patrem misericordiae,

Nam post plura miracula
Sancti viri reliquiae
Mirae dantur memoriae

Divina providentia.

3. Sanctus Botuidus erigit
Elisos, justos diligit,

Iure custodit advenas,
Pupillos pie suscipit
Et compeditos eripit,

Amor fovet indigenas.

4. Visu caecos illuminat,
Dispersos multos glutinat

Unitati catholicae,
Incredulos humiliat,
Contritos corde solidat

Vigore patientiae.

5. Lauda Christum, plebs Suecica,
Collegit aula caelica

Patronum tuum inclitum,
Cui confidenter supplica,
Quod tibi sors angelica

Detur post mortis exitum.

Ad Magnificat.

A. Botuide, tiro nobilis,

Victor scandens de proelio,
In morte rosae similis,

Vita candenti lilio,
Nos huius viae labilis

Latentes in exsilio
Coniunge, martyr humilis,

Sanctorum domicilio.

Ad Matutinum.

Invitatorium.

Regi canamus dulciter

In psalmis, hymnis, canticis,

Qui martyres perenniter
Coronis ornat caelicis.

In 1. Nocturno.
Antiphonae.

1. Fructum suavem protulit

Lignum pulchrum in tem-
pore,
Quod verbo patris obtulit
Semet fideli pectore.
2. Hic in timore Domini
Se disciplinae subicit,
Novo conformis homini
Vetustum iugum proicit.

3. Voce clamat ad Dominum,
Dum surgit tribulatio,
Tumorem sedat fluminum
Superna consolatio.

Responsoria.

1. Rosa rubens egreditur
De spinarum acumine,
Gemma terrae subtrahitur

Praecellens pulchritudine,
Botuidus cum producitur
Ex paganorum semine,
V. Aurum splendens efficitur,
Argentum purum redditur
Purgatum a rubigine.
2. Propheta spernit patriam
Sperans honorem gloriae,
Athleta terram propriam
Fruendae spe victoriae,
Botuidus sequens aquilam
Solem quaerit iustitiae;
V. Sanctam servat modestiam,
Dat creatori latriam
Contemptor idolatriae.

3. Sicut gravatus senio

Cervus flumen desiderat,
Ad aquas pro remedio

Tracto veneno properat,
Botuidus sic diluvio
Baptismi se regenerat;
V. Syrus Iordanis fluvio
Lotus repletur gaudio
Reversus, unde venerat.

In 2. Nocturno.
Antiphonae.

1. Virtus Dei mirabilis

Sanctum suum mirificat,
Qui status commendabilis
Exemplis se sacrificat.

2. Scuto salutis tegitur
Divinae se subiciens
Voluntati, qua regitur
Omne bonum perficiens.

3. O nomen admirabile

Botuidi, bonis moribus
Ornatum, quod fit simile
Rebus nobilioribus.

Responsoria.

1. De Sodoma Loth exiens
In monte servat animam,
David salvatur fugiens,

Ioseph evadit dominam,
Iustus currit pertransiens
Ad urbem munitissimam ;
V. Pauperibus compatiens
In caelo parat sapiens
Mansionem tutissimam.

2. Lampas ardens virtutibus
De facili contemnitur,
Quia dignus honoribus

A stultis non diligitur ;
Veris adoratoribus
In tenebris lux oritur,
V. Dum proximi laboribus
Et inopum gemitibus
Facto, dicto succurritur.

3. Iusto Dei iudicio
Percutitur inedia,
Pravae linguae detractio,
Plena semper invidia,
Succedit pro convicio
Prona misericordia ;
V. Quem tenuit defectio,
Duplex cibat refectio
Paterna dans remedia.

In 3. Nocturno.

Antiphonae.

1. Sicut passer nidificat
In tecto solitarius,
Quietem sibi fabricat
Excellens operarius.

2. Decore pudicitiae

Martyr almus emicuit,
Flore nitens munditiae
Deum videre meruit.

3. Completo desiderio

Coronam tenens auream
Meretur pro martyrio
Digne Botuidus alteram.

Responsoria.

1. Draco serpentem suscitat
Dormientem in gremio,
Sciens, quod nullus vigilat,

Hostis peior domestico,
Hinc Sisaram dum latitat,
Iahel necat sub pallio.
V. Behemot umbram visitat,
Servum dolosum agitat,
Intentum homicidio.

2. Dei lucens imagine

Auri dragma dum perditur,
Opus exstat indagine,

Tota domus evertitur,
Sapientis examine

Tantus thesaurus quaeritur.
V. Ut nubes duxit lumine,
Sic avis tristes carmine
Vocat, quo martyr moritur.

3. O nardus odorifera,

Aegris sana corporibus,
Apis fructu mellifera,

Corda mulcens dulcoribus,
Precatus offer munera
Christo pro peccatoribus,
V. O vinea fructifera,

Translata super aethera,
Nunquam marcescens flori-
bus.

In Laudibus.

Antiphonae.

1. Sedes parata militi
Certanti pro iustitia
Monstrat, quanti sint meriti
Eius pia suffragia.
2. Turba languens, quae flagitat
Huius sancti praesidia,
Curata Deo iubilat

Tanta laudans magnalia.
3. Gentes in terra dirigit

Per vias rectas gradiens,
Manum cadenti porrigit
Plures aversos corrigens.
4. Fontes novi scaturiunt

Sancto dantes obsequium,
Pisces aquae conveniunt
Ad martyris imperium.

5. Laus eius in ecclesia

Post mortem iuste colitur,
Qui diligens humilia

Vento laudis non frangitur.

Ad Benedictus.

A. O turris fortitudinis,

Candens nocte carbunculus,
Corona pulchritudinis,

Purae murrae fasciculus,
Columna rectitudinis,

Caecis et claudis baculus,
Noster ad sedem luminis

Promotor esto sedulus.

In 2. Vesperis.

Ad Magnificat.

A. Vale, robur debilium,

Monstratus ab avicula,
Consolator flebilium,

Puritatis ovicula,
Te pugilem mirificum

Tua laudat plebicula,
Numen petit salvificum

Sua deflens pericula,
Quam per tuum auxilium

Vitae subacta nebula
Tractu ducat ad filium

Pater vivens in saecula.