20. De sancta Anna.

In 1. Vesperis.

Ad Magnificat.

A. Ave, mater insignita

Donis grati arum,

Via, per quam venit vita,

Doctrix animarum,

Parens mundo requisita,

Decus feminarum,

Per te nobis sit largita

Venia culparum.

Ad Matutinum.

Invitatorium.

Exsultemus Christo regi

psallentes victoriam,

Qui matris suae genetricem

transvexit ad gloriam.

In 1. Nocturno.

Antiphonae.

1. Anna, nupta Ioachim

foedere regali,

Servivit altissimo

cultu speciali.

2. Distulit sterilitas

fructum geniturae,

Sed supplevit gratia

defectum naturae.

3. Exspectans fideliter

venturum Messiam,

Gradu distans unico

peperit Mariam.

Responsoria.

1. Ad ortum gratiae,

promissae caelitus,

Aurora rutilat

in vase spiritus,

Dum praeeligitur

Anna divinitus ;

V. Summorum civium

gaudet exercitus,

Quod sit hominibus

ad vitam reditus.

2. Nutrita Bethlehem

parentum studio,

Transit in Nazareth

data coniugio,

Christum praenuntians

certo mysterio,

V. Cuius nativitas

atque conceptio

Loca dant eadem

sub privilegio.

3. Stirpis Davidicae

clara progenies,

Virtutum probitas,

gestorum series

Ostendit, ubi sit

sanctorum requies ;

V. Matris et filiae

coniuncta species

Legis et gratiae

fit unus paries.

In 2. Nocturno.

Antiphonae.

1. Anna gerit filiam

forma speciosam,

Sed quod pluris laudis est,

summe gratiosam.

2. Conceptus non derogat

matris honestati,

Nam proles eximitur

a labe peccati.

3. Gloriosa civitas

Nazareth electa,

Cuius civis exstitit

Anna praeelecta.

Responsoria.

1. Turbantur steriles

legis opprobrio,

Superna pietas

adest remedio,

Duos laetificat

una promissio

De fructu fertili,

peccati nescio.

V. Probat citissime

pia devotio,

Quod nil timendum est

Deo propitio.

2. Mons domus Domini

conscendit verticem,

Virtutem praeferens

et vitam simplicem,

Annae fecunditas

tendit ad apicem,

Uteri sterilis

non timens obicem.

V. Dum legis litera

monet pontificem,

Adpellat sanctitas

ad summum iudicem.

3. Mater mirabilis,

digna memoria,

Mundum laetificat

post damna tristia,

Cuius fecunditas

in prolis gratia

Terrena reparat

atque caelestia.

V. Anna, perpetuae

salutis nuntia,

Mariam pariens

innovat omnia.

In 3. Nocturno.

Antiphonae.

1. Anna fructu gravida,

sed nil portans grave,

Manna verum continens

omnibus suave.

2. Stupens ex miraculo

concepit puellam,

Quid est mirabilius?

terra parit stellam.

3. Universi praedicant

te matrem felicem,

Per quam nos suscepimus

Christi genetricem.

Responsoria.

1. Fugantur tenebrae

primae tristitiae,

Nova lux oritur

verae laetitiae;

Nullam particulam

sonat iniuriae,

Quod Anna dicitur

inventrix gratiae,

V. Ex qua dum nascitur

flos innocentiae,

Salus ostenditur

et arrha gloriae.

2. Candescit Libanus,

cedrus extollitur,

Caelesti lumine

terra perfunditur,

O quantis gaudiis

Anna reficitur,

Divino munere

cum benedicitur!

V. Haec mater merito

cunctis praeponitur,

Quarum integritas

natura solvitur.

3. Regalis semita

strata virtutibus,

Aetemi principis

parata gressibus,

Finem constituit

suis limitibus,

Dum Anna colligit

rosam ex floribus ;

V. Sic benedictio

promissa patribus

Annam dignificat

in multis matribus.

In Laudibus.

Antiphonae.

1. Fructus Annae nobilis

induit decorem,

Administrans saeculis

gratiae splendorem.

2. Per Annam reducitur

annus iubilaeus,

De cuius propagine

venit homo Deus.

3. Columba revertitur

ramum dans olivae,

Dum ex Anna nascitur

flos virtutis vivae.

4. Lignum vitae fert medelam

labentis naturae,

Cuius fructum benedicunt

omnes creaturae.

5. Laus et honor Iesu Christo,

nato Dei patris,

Cum quo regnat in excelsis

mater suae matris.

Ad Benedictus.

A. O parens magnifica,

nobilis persona,

Cuius proles praeminet

caelesti corona,

Famulorum precibus

fave, mater bona,

Cunctisque temporibus

pacem nobis dona.

In 2. Vesperis.

Ad Magnificat,

A. Anna, sancta mulier,

toto desiderio

Te beatam praedicat

omnis generatio,

Mariam conspiciens

in regali solio,

Tu amore filiae

sis nobis praesidio,

Ne nos Christus veniens

damnet in iudicio.