23. De sancta Anna.

In 1. Vesperis.

R. De spina Hebraica,
De stirpe Davidica

Recens surgit rosa,
Mundo dans primordium,
Salutis exordium,
Anna generosa ;
V. Mariam haec genuit,
Miserorum scutum,
Quia semper viruit
In donis virtutum.

Ad Magnificat.
A. Magnificent vigiles
Exaltantem humiles

Deum omnes gentes,
Ut Annae precatibus
A cunctis reatibus

Nostras mundet mentes.

A d Matutinum,
Invitatorum.
In tam sacro sollemnio

Matris matris Dei
Adoremus in gaudio
Deum iubilaei.

In 1. Nocturno.
Antiphonae.
1. Ex ore infantium

Deus laudem perficit,
Per Annae coniugium
Satanam cum deicit.
2. Hoc in sole posuit
Suum tabernaculum,
Dum salvare voluit
Deus suum populum.

3. Prae suis consortibus
Oleo laetitiae
Hanc iunctam caelestibus
Deus unxit hodie.

4. Suum tabernaculum
Dominus sanctificat,
Annae cor dum lectulum
Sibi soli dedicat.

5. Magni regis civitas,
Anna laetabunda,
Omnibus sterilitas
Tua est fecunda.

6. O beata Christi ava,
Sordes nostras prece lava,
Tuae natae interventu
Ut locemur in conventu
Beatorum omnium.

Responsoria.

1. Nova lux mundo oritur,
Fulgore grato rutilans,
In gaudium plebs tollitur
Novellas laudes iubilans;
V. Ad Annae natalitia
Nova fulgent sollemnia.

2. Felici origine
Sacra de propagine

Anna sumpsit ortum,
Vita huius inclita
Nobis praestet merita
Et salutis portum ;
V. O felix nativitas,

Qua paratur, qua speratur
Aeterna felicitas.

3. Annos Anna pubertatis

Dignis currens cursibus,
Viro paris honestatis
Legis nubit ritibus,
V. Ioachim est desponsata,
Purpurata et ditata
Floret aequis moribus.

4. Actus vitantes obscenos
Caelibe coniugium
Annos simul per bis denos
Pio vivunt studio,
V. Ambo denique nobiles,
Sed ventris fructu steriles.

In 2. Nocturno.

Antiphonae.

1. Divina iustitia

De caelo prospexit,
Sorte multifaria

Quae Annam protexit.

2. Sanctis sunt in montibus
Annae fundamenta,
Quae semper virtutibus
Virebat intenta.
3. Extendit ad fortia
Felix illa manum,
Sic in innocentia

Mundum vicit vanum.
4. Praeceplis legalibus
Tota intendebat
Nec ullis erratibus
Ab his recedebat,

5. Viro juncta socia
Nexu coniugali,
Boni tamen conscia
Morbo carens mali.
6. Gaudeat ecclesia
Annae de natali,
Habentis exordia
De stirpe regali.

Responsoria.

1. Iesu Christe, nepos cuius
Tu es, ob amorem huius

Molem tergens peccatorum
Regno transfer nos polorum,
V. Fecundatos inclitis
Castitatis meritis.
2. Ex Nazareth Ioachim
Originem produxerat,
Annam hanc in Bethlehem
Clara stirps genuerat,
V. Ambos aeque nobiles,

Devotos et dapsiles.
3. Rei suae substantiam
Devota consuetudine
Dant partitam trifariam
Vivi Dei pro nomine,
V. Partem dant egentibus,
Partem sacerdotibus,
Partem suis usibus,
4. Horum vita fuit grata
Deo in caelestibus,
In virtute solidata
Placens et hominibus,
V. Non indigne, sed tam digne
Rosa iuncta lilio.

In 3. Nocturno.
Ad Cantica.

A. Mundi decus, orbita,
Gratulans laetare
Celebrando inclita
Festa Annae clarae.

Responsoria.

1. Angelus hos consolatur,
Eisdem dum nuntiatur

Nascituram filiam,
Mundo dantem gratiam,
Angelis laetitiam,
Trinitati gloriam.
V. Spargit ut sol radium,
Pariet haec filium,
Vitae dantem bravium.
2. Anna tandem filiam
Peperit eximiam,
Maeror terminatur,

Fugatur opprobrium,
Cumulatur gaudium
Risus frequentatur.
V. O grata sterilitas,

Quam fecundat et secundat
Tantae prolis dignitas.

3. Vovent ipsi, si daretur
Nuptiarum praemium,
Ipsum quidem offerretur
In Dei servitium.
V. Hoc tribus sollemniis
Quaerunt sacrificiis
Et piis officiis.

4. O felix commercium,
O caelebs coniugium
Ioachim et Annae,
Qui de stirpe regia
Natam plenam gratia
Gignunt, arcam mannae;
V, Felices hi gemini

Deo cari, mundo clari,
Nulli dati crimini.

In Laudibus.

Super Psalmos.

A. Annam sacram induit
Dominus decore,
Semper enim viruit
In eius amore.

Ad Benedictus.

A. In domo ecclesiae
Sol refulsit gratiae
Luce radiosa,
Anna gratiosa,

Iesu, cuius inclitis
Precibus et meritis
Nos ex alto visita,
Cuncta delens debita.

Per Horas.

Ad Primam.
A. Obstruxit Deus omnium
Os Ioachim dicentium
Maledicto

legis obnoxium.

Ad Tertiam.
A. Israeli convenit
Deo benedicere,
Qui de ipso voluit
Matrem sibi sumere.

Ad Sextam.
A, Vobis, Sion filiae,
Magnae sunt laetitiae
Dei pro hospitio
Praeparato filio.

Ad Nonam.
A. Miserendi patribus

Tempus adventabat,
Mariam cum angelus

Venturam monstrabat,
Quae cum matre postulet,
Ut nos pie visitet
Oriens ex alto.

In 2. Vesperis.

Ad Magnificat.

A. Abraham in semine
Pepigisti, Domine,

Nos omnes salvare ;
Annue ergo precibus,
Ut iurasti patribus,

Nostri miserere.