QUAESTIO I.

Utrum Sacramenta novae legis habeant efficaciam suam respectu gratiae conferendae a passione Christi ?

Alens. 4. part. quaest. 9. membro 7. D. Bonavent. hic dub. 2. et art. I. quaest. I. D. Thom. 3. part. quaest. 62. art. 5. et quaest. 64. art. 3. Vasq. ibi disp. 135. Vega 7. in Trident. cap. 18. Scotus inOxon . hicquaest. I. et Sententiarii.

Circa distinctionem secundam quaero: Utrum Sacramenta novae legis habeant efficientiam suam respectu gratiae conferendae a passione Christi? Arguitur quod non. Ab eo quod non est, non habet aliquid suam efficientiam, quia secundum Philosophum 5. Metaphysic. cap. 1. de causa, et 2. Physic. text. 37. causa in actu et effectus in actu simul sunt, et non sunt; sed passio Christi non est. sed praeteriit ; ergo, etc.

Item, si sic, aut ergo a passione ut praevisa, vel ut exhibita? Si ut praevisa, ergo Sacramenta veteris legis et novae legis ex vi Sacramenti habent efficientiam a passione Christi praevisa, quia illa Sacramenta erant instituta ante passionem Christi, quia Apostoli baptizabant ante mortem Christi, patet Joan. 3. Eucharistia etiam fuit instituta integra ; ergo, etc.

Item, respectu gratiae non potest esse causa meritoria, quia gratia gratis datur, non meritis redditur, secundum Apostolum Rom. 9. sed passio Christi, si est causa, non est causa nisi meritoria ; ergo, etc.

Item, si haberent efficientiam a passione Christi, hoc maxime esset a vulnere laterali, quia ab illo vulnere profluxerunt omnia Sacramenta secundum Augustinum 15. de Civit. cap. 26. profecto illud vulnus, etc. sed non habuerunt efficientiam ab illo vulnere, quia si sic, non nisi meritoriam. Sed hoc est falsum, quia id vulnus fuit Christo inflictum ipso jam mortuo, patet Joan. 19. Nullus autem meretur sibi, nec aliis post mortem ; ergo, etc.

Oppositum vult Magister in littera, et Augustinus de nupt. et concupisc. cap. 27.