36. De sancta Apollonia.

In 1. Vesperis.

Antiphonae.

1. Regia ex prosapia

Refulgens Apollonia

Ovans rerum inopia

Caelica fert stipendia,

Quam gignit Alexandria.

2. Quae rorem sugens pneumatos

Subtraxit cultum idolis,

Affirmat pacis foedera

In Deo experienda.

3. Stupore nullo terretur

Nec blandimentis laeditur

Fides inchoata,

Crucifixum praedicat

Et opibus renuntiat.

4. Rutilabat facie

Nimium decora,

Largitorem gratiae

Flagitat sonora

Prece, ut intrepida

Vincat criminosa.

5. Mortis gustat calicem

Virgo generosa,

Ad caeli migrat apicem

Martyr animosa,

Praepolitis moribus

Castis iuncta amplexibus.

R. Surge, Apollonia,

Oppressorum onera

Supplici oramine

Alacriter alleva.

Nostra te suspiria

Pulsant adiutricem,

Fuga quaeque noxia

Et Stygis merge picem;

V. Gaudet tua praesentia

Tota caeli curia,

Et tua sublimatio

Est nobis gratulatio.

Ad Magnificat.

A. Ave, pietatis oliva

Ave, castitatis

amatrix sedula,

Ave, martyr triumphalis,

Venustatis mirificae,

Lucerna ad instar carbunculi

Mundi per climata

Coruscans, gemma pretiosa.

Ave, rosa puritatis,

Sancta Apollonia,

Nostrum statura pravitatis

Dissipa

Per tua suffragia,

Ut hurus vitae

In procella

Contraria

Salutis bella

Vincere cum gloria

Valeamus,

A d Matutinum.

Invitatorium.

Christum, solem iustitiae,

Cum Apollonia intuentes,

Ut noctem maestitiae

Pertranseuntes

Auroram gratiae

Vigilantes praestolemur,

Iubilantes laudibus

Deum adolemus.

In 1. Nocturno.

Antiphonae.

1. Nomen tuum admirabile

Ore virgineo praedicatur.

Domine, dum Apollonia

Vero exercitio

Floret in urbe Alexandria.

2. In omnem terram provehitur

Felix eius memoria,

Clara orta prosapia

Deum fatetur idola

Spernendo vaga.

3. Quis iste rex est gloriae,

Palmam qui victoriae

Contulit Apolloniae?

Quae carnis iura domitans

Montem conscendit Domini,

Anhelans ad caelestia.

Responsoria.

1. Nobilis Apollonia,

Egregia

Orta ex progenie,

Flagrat Dei amore,

Balsamato pneumatis

Perfusa rore.

V. Insignis virtutibus

Mundi opibus

Renuntians vana

Et gaudia spernit.

2. Idolatriae

Tradita cultui

Inclusa virgo beata,

Sed idolo dissipato

Aurum miseris

Distribuit catervis.

V. Sunt, inquit, haec daemonia,

Pater, tua idola,

Unum crede Deum

Colendum.

3. Turbato spiritu

Virginis admiratur

Pater industriam,

Quam audiens in cruce

Domini gloriari

Iussit eam acriter

Virgis verberari ;

V. Quae caedis invicta flagellis

Praedicat ferventius

Christum adorandum.

In 2. Nocturno.

Antiphonae.

1. Dilexisti iustitiam,

Virgo beata,

Odistique malitiam

Christo dedicata,

Ab intus regis purpura

Gaudes decorata.

2. Venite et videte

Martyris athletae

Victoriam mirandam,

Quae sibi refugium

Ponit Dei filium,

Pneumatis industria

Redolens ab infantia.

3. Solis ardore

Inflammata caelitus

Fundamentum

Radicat montibus

In altissimis,

Quo pace

abundans habitat,

Mundi ritu

spreto saevissimi.

Responsoria.

1. Ad certamen accersitur

Virgo generosa,

Sapientum philosophia

Inani non perturbata,

Solvit obiecta

Spiritus munimine,

Quos fidei professores

Martyrii sub serto

Dirigit ad caelos.

V. Ad quorum fidei consensum

pater inflatur,

Pudet scientiae succumbere

exercitum

Quosque furibundus

tradidit iugulo.

2. Bis sex virginibus

nititur applicatis

Hanc pater ad cultum

trahere vanitatis,

Quibus tandem baptizatis

Pari voto quaeritant

Veritatis limina ;

V. Clamant omnes pariter

Christum venerandum.

3. Matrona quaedam Burgundiae

Dentium dolore

Multo tempore

Erga partum dissipata,

Supplici rogatu

Flagitans Apolloniam,

Ut sanitatis remedium

Recuperet per eam,

V. Mox adest consolatio,

Nam dentium reparatio

Petentem replet gaudio.

In 3. Nocturno.

Antiphonae.

1. Nil territa supplicio

Nec cutitur flagitio,

Sed fatur constans animo

Deos esse daemonia.

Sunt, inquit, haec immunia

A gratiarum munere,

Dat, qui creavit omnia,

Languentibus antidota.

2. Rectis corde

laetitia oritur,

Abundans noctis

decrescit maestitia,

Dum virgo Apollonia

Praedicat salubria.

3. Iubilate

Deo, omnis terra,

Hymnizate

laudis cantica,

Psalterium

iucundum cum cithara

Frequentate

voce altisona

In Apolloniae memoria.

Responsoria.

1. Convivis discumbentibus,

Quos dulcis memoria

Fovit Apolloniae,

Puritatis irritator

Sub pietatis specie

Intrans domum hospitae,

Dolo latenter subnixus,

Infantulum quendam misere

Tradidit ustioni,

Cuius fraudis inscia,

Cura peregrinos sollicita,

Singula egentibus

Mater dolore

tacta intrinsecus

Gaudens ministrabat.

V. Tandem facti veritas.

Dei providentia

Ossibus pueruli

Repertis, lacrimose

Promulgatur singulis.

2. Quo audito

dolor inaestimabilis

Cor maternum concutit

Et membris infantis

Stricta fascia colligatis

Cucurrit sitibunda

In basilicam virginis

Apolloniae,

Petens lacrimarum imbre

Defunctum sibi restitui.

V. Audita est deprecatio

Mulieris sedula,

Usa Dei solatio,

Revixit puer ut antea.

3. O ferventis caritatis vernula,

Sancta Apollonia,

Castitatis cellula,

Virtutum floribus stipata,

Suscipe cum iubilo

Supplicum precamina,

Dele facinora,

Quae aethereo tripudio

Coruscas amicta.

V. Tuo obtine precatu,

Ut lentis donetur

Sanitas mentalis,

Liberemur a malis,

Calor et amor

Crescat in nobis.

In Laudibus.

Antiphonae.

1. Laudemus salvatorem omnium,

Qui vineam suam sanctorum

Per prodigia

Fructificavit varia.

2. Beata Apollonia

Hostis versutias,

Mundi spurcitias,

Caelibatus flore dotata,

Sprevit ut sordida.

3. Amoris brachiis

Christum amplectitur,

Renuit consolari

Mundi in deliciis,

Quas plenas fatur vitiis.

4. Praebet solatia

Matri desolatae,

Grata dum convivia

Aguntur delicate,

Suscitat infantulum

Temere ablatum.

5. Agnum sine macula

Morte pretiosa

Comitatur tenera

Virgo speciosa,

Propter Christum decollatur,

Ipsa a quo laureatur.

Ad Benedictus.

A. Benedictus rerum omnium

Conditor magnifice,

Qui sexui femineo

Palmam victoriae contulisti,

Ut sancta in Apollonia

Dedisti cernere,

Quae mortem perdens,

Vitam reperiens

Migrat ad caelestia.

In 2. Vesperis.

Ad Magnificat.

A. O pater misericordiae,

Cuius gratia

omnia subsistunt,

Pons immensae pietatis,

Cuius liquor terram

fructificat aridam,

Miserere peccatorum

oneribus gravatis,

Tibi enim soli peccavimus

Et mala coram te fecimus,

Largire supplicibus tuis

Lumen visitationis tuae,

Ut iter ducens ad vitam

attingamus,

Suffulti beatae Apolloniae,

Martyris tuae suffragio,

Plena corporis et animae

Sanitate concessa

Gaudia siderea

possideamus.