QUAESTIO IV.

Utrum adultus non consentiens possit recipere Sacramentum Baptismi?

Alens. 4. part. quaest. 18. membro I D. Bonavent. hic I. part. art. 2. D. Thomas 3. part. quaest. 68. Richardus dist. (5. art. 2. quaest. 3. Palud. quaest. 2. Durand. quaest. 7. Suar. 3. tom. disp. 14. sect . 2. Vasquez d . 57. Scotus hic quaest. 4.

Consequenter quaeritur de Baptismo in comparatione ad adultos, et primo : Utrum adultus non consentiens possit recipere Sacramentum Baptismi? Arguitur quod non, nullus dissentiens contrahit matrimonium carnale; ergo nec matrimonium spirituale. Antecedens est manifestum. Consequentia patet, quia matrimonium spirituale contrahitur magis actu spirituali interiori quam matrimonium carnale ; in Baptismo autem contrahitur quoddam matrimonium spirituale, quia anima tunc primo desponsatur Deo, abnegando Diabolo et pompis ejus, et Deo per votum se firmiter et inseparabiliter conjungendo ; ergo, etc.

Item, magis nocet baptizato malitia sua, quam malitia ministri baptizantis ; sed in ministro baptizante necessario requiritur intentio baptizandi ; ergo in baptizato intentio baptizari ; non ergo potest invitus baptizari.

Item, Augustinus et in littera ponitur, sicut patrini respondent pro parvulis, quando baptizantur, ita et adultus respondere debet pro se ; sed si patrini non consentiant Baptismo parvuli, non est baptizatus ; ergo si adultus invite recipit Baptismum, non est baptizatus.

Item, in Baptismo fit quoddam votum spirituale, per quod anima obligatur: sed nullus invitus, vel dissentiens vovet se, vel obligat se alicui.

Contra, extra de Bapt. et ejus effectu, cap. Majores, quilibet non invitus recipit effectum Baptismi, et ratio subditur ibidem, quia Baptismus semper suscipitur, quando obex contrariae voluntatis non invenitur; ergo furiosi et dormientes tunc baptizati vere recipiunt, licet non consentiant, et cogendi sunt vivere secundum legem Christianam.