46. De sancta Barbara.

In 1. Vesperis.

Antiphonae.

1. Exaltemus in suavi

Cor et mentem cithara,

Ut gustemus mellis favi

Torrentem cum Barbara.

2. Quae carne [quidem] sterilis.

Sed mente fecunda,

Virgo et mater fertilis

Laetatur iucunda,

3. Dum in turri habitavit

Arte custodita,

Virtus pacis abundavit

In mente munita.

4. Domum dum aedificat

Pater eius vanam,

Fenestram multiplicat

Ob fidem Christianam.

5. O nive candidior,

Crystallo nobilior,

Agni lana tu vestiris,

Aquae fluxu tu fulciris,

Dum fiat Auster verior.

Ad Magnificat.

A. Adest dies magnae laudis,

In qua virgo expers fraudis

Magnificat Dominum,

Dum exultantem spiritum

Potenti eum victoria

Christo reddit Barbara.

Eia, pia, da gustare

Christi cibum miseris

Hic in via et ditare

Paupertatem inopis.

Ad Matutinum,

Invitatorium.

Christo regi exsultantes

iubilemus iugiter,

Sponsae Dei famulemur,

ut regnemus perenniter.

In 1. Nocturno.

Antiphonae.

1. Paulo minus ab angelis

Sponsus sponsam minuit,

Dum caelebs baec celebris

Carnis iura diluit.

2. A summo caelo deitatis

Ut columba graditur,

Ramum portans castitatis

In ipsum revertitur.

3. Speculare Sion montem,

Uberem deliciis,

Manum scandit per insontem

Et cordis munditiis.

Responsoria.

1. Sublimi in solario

Virgo residens Barbara

Cum virtutum vario,

In mente virginea

Ut caelesti sacrario

Capit divina contubernia.

V. Viri thorum despicit

Virgo, quae chorum conspicit

Mente angelorum.

2. Aquae vivae rivulum,

Charismatum diluvium

Se hic expressit,

Vim salubrem languidis

Dum fonti baptismatis

Sui impressit.

V. Fons signatus permanens,

Hortus clausus, proferens

Paradisi fractum.

3, O fenestra trini Dei,

Quam pertransit lux diei,

En, ipse per te prospicit

In ternarum structura,

Trinitatis cuius vestigium

Quaevis gerit creatura,

V. Sed tu signaculum Dei

Es similitudinis,

Plenum decore luminis.

In 2. Nocturno.

Antiphonae.

3. Oblita patris proprii

Ob Christi regis amorem

Ad poenas supplicii

Se offert promptiorem.

2. Ad Dei virtutem

spe plena refugit,

Tyranni dum rabies

ut leaena rugit.

3. Eam Deus in aetemum

Sic fundavit, quod supernum

Verbum visu prospicit,

Quod ex auditu credidit.

Responsoria.

1. Eia, virgo mirabilis,

Paries tibi labilis

Dat iter manens stabilis.

Vere splendor es solaris,

Ut in vitris iens claris,

Dum scissuram nullam paris.

V. Sic ex parte active

Egisti,

Quod in partu passive

Gessit mater Christi.

2. Haec est stella matutina

Clausa sub signaculo,

Quam illustrat lux divina

In carceris ergastulo,

V. Hoc exorto lucifero

Caelum, terra plaudit gaudio.

3. Septemplici radio

Ut sol coruscavit,

Haec luna pugnans stadio

Dum laeta toleravit

Carceris angustias,

Flagella et ungulas,

Lampades et malleum,

Abscissionem uberum,

V. Ferientem

caput gladium,

Ut argentum

purgatum septuplum.

In 3. Nocturno.

Antiphonae.

1. Afferte Deo gloriam,

Qui gentium sculptilia

Muta esse daemonia

Docuit hanc familiam.

2. Exsulta, Sion inclita,

Deum adorant angeli,

Dum haec Iudae filia

Dat odorem balsami.

3. Novum agno canticum

Et iubilum laetitiae

Chorus canit virginum

Ob titulum sanctimoniae.

Responsoria.

1. Ab intus per aureum

Vestitum haec protecta,

Gemmas gerens virtutum

In mente electa,

Terram circuit in derisum

Nuda carne, mundo corde

Attingens paradisum.

V. Sed tegens caelum nubibus

Hanc vestivit

angelorum manibus.

2. Nequaquam exterminium

Inferi hunc ferit,

Qui pium patrocinium

Barbarae hic quaerit

Et promptum cordis scrinium

Ad laudes eius gerit ;

V. Hoc a Christo impetravit,

Pro quo mori non expavit.

3. O Dea Saturnea

Manna pluens caelicum,

Apis tu es mellea

Cibum ferens angelicum,

Famulis tui nominis

Ferculis frui corporis

Salvatoris

Da, virgo decoris.

V. Tu mons regalis culminis

Eos vitalis veniae,

Flos vernalis germinis,

Dos dotalis gratiae.

In Laudibus.

Antiphonae.

1. Nimis admirabilis

In altis Christus Iesus,

Quem in imis tam fragilis

Sexus colit caesus.

2. Oves Christi pascuae

Laude sunt venustae,

Nam ad nutum Barbarae

Oves sunt locustae.

3. Fame, siti cruciata

In vili domicilio

Christo fuit satiata

Ex caeli edulio.

4. In igne sancti flaminis

Benedicamus Dominum,

Igne caeli fulminis

Qui consumpsit Dioscorum.

5. Iuvenes et virgines

Laudes dent et gloriam,

Qui ad caeli cardines

Christo vehit Barbaram.

Ad Benedictus.

A. Benedictus sit pater luminum,

Qui Barbaram, dum petivit

Pro salute omnium

Sibi famulantium

Exaudivit,

Per quam delicti venia

Pax atque iustitia,

Fax lucis in tenebris

Oritur de superis.

In 2. Vesperis.

Ad Magnificat.

A. Dei esse digitus

Barbara probatur,

Per quam crucis titulus

In petra formatur,

Nam impressit per digitum

In marmoris duritie

Crucis signum inclitum

Manens usque hodie.