QUAESTIO V.

Utrum adultus fictus recipiat effectum Sacramenti baptismi.

Alens. 4. part. quaest. 18. membro 2. art. I. et 2. D. Bonavent. hic I. part. 2. quaest. 2. Richard. art. I. quaest. 2. O. Thomas 3. part. quaest. 69. art. 9. Vasquez 3. part. disp. 158. Scotus in Oxon. hic quaest. 5.

Secundo quaero de adulto in comparatione ad Baptismum : Utrum adultus fictus recipiat effectum Sacramenti Baptismi ? Arguitur quod sic, ad Gal. 3. Quotquot estis baptizati, Christum induistis; sed Christus non est in aliquo ut indumentum in induto, sine gratia : ergo, etc.

Item, si fictus baptizatus non recipiat gratiam, ergo recedente ab ipso fictione, oportet ipsum baptizari ad hoc ut recipiat gratiam et effectum Baptismi ; consequens est falsum, patet in Decret. I. quaest. I. cap. Sicut fictis, et auctoritatibus Sanctorum in littera.

Consequentia probatur, quia si aliquis fictus recipiat Sacramentum Paenitentiae, et absolutionem talem sine gratia, oportet ipsum iterum paenitere et absolvi de illa fictione, ad hoc ut gratiam recipiat, et effectum Sacramenti.

Item, effectus Baptismi est expulsio peccati ; aut ergo peccati, quod infuit prius, et hoc non, quia non remanet expellendum, nec indiget expelli ; aut peccati, quod inest, et hoc non, quia si expellat peccatum, quod modo inest, ergo nullum peccatum quod inest, potest impedire effectum Sacramenti Baptismi, nec ergo fictio impediet effectum Sacramenti, non enim impediret nisi quia est peccatum.

Oppositum vult Augustinus de paenit. cap. 2. et patet in littera : Omnis qui jam suae voluntatis arbiter constitutus est, cum accedit ad Sacramentum fidelium, nisi paeniteat eum veteris vitae, novam non potest inchoare.

Item, de Baptismo parvulorum dicit Augustinus : Tunc valere incipit Baptismus ad salutem, cum illa fictio veraci confessione recesserit, quae corde in malitia perseverante peccatorum ablutionem non sinebat fieri ; ergo illa fictio impediebat ablutionem in Baptismo, et per consequens gratiam.