QUAESTIO I.

Utrum malitia Ministri impediat effectum Baptismi, et an possit conferre verum Baptismum ?

Alens. 4. part. quaest. 16. memb. 2. D. Bonavent. art. 2. quaest. I. Richard. art 3. quaest. 3. D. Thom. 3. part. quaest. 64.- art. 5. et 9. Vasquez ibi disp. 437. Suarez disp. 13. lib . 4. Castro V. Baptismus haer. 5. et V. Potestas. Waldensis I. tom. lib. 3. cap. 81. et 82. Coccius 2. tom . lib . 5. art . 6. Scotus in Oxon. hic quaest. I.

Circa distinctionem quintam, quaero : Utrum malitia Ministri impediat effectum Baptismi, et an Minister malus possit conferre verum Baptismum ?

Arguitur quod non. Ambrosius de catechizandis rudibus, dicit quod malus Sacerdos in conferendo Baptismum non sanat. Et hoc probatur tripliciter, primo per illud Psalm. 31. In diluvio aquarum multarum ad eum non approximabunt.

Item, secundo per illud Apostoli ad Rom. 14. Omne quod non est fide, peccatum est.

Tertio secundum eum ibidem, recipiens Sacramentum a tali, recipit ad judicium, non ad salutem.

Item, per rationem, membrum aridum non potest esse medium influendi vitam in alia membra ; ergo non potest esse medium influendi alteri vitam per collationem Sacramenti.

Item, in aqua requiritur aliqua sanctificatio, ut sit conveniens materia Baptismi, imo aliqua virtus supernaturalis (secundum unam opinionem) ; sed Sacramentum Baptismi magis dependet a ministro, quam a materia, ut aqua, sicut effectus principalis est ab agente plusquam a passo ; ergo magis requiritur sanctitas in ministro, quam in aqua ; ergo, etc.

Item, errans circa aliquem articulum fidei non est in via salutis, quia non habet infusam fidem, nam error circa qualemcumque articulum fidei non stat cum fide infusa, et per consequens cum gratia, quia fides infusa, saltem formata, non est sine gratia.

Sed Cyprianus Martyr dixit, quod minister malus non dat verum Baptismum ; ergo cum fuit in via salutis, non erravit circa aliquem articulum fidei ; veritas enim Sacramentorum reducitur ad aliquem articulum, ut ad illum articulum, Ecclesiam Catholicam ; ergo non est de necessitate fidei credere quod hoc Sacramentum ministretur tam a bono quam a malo, aliter errasset Cyprianus Martyr, et fuisset sine gratia in via ad salutem.

Oppositum apparet per multas auctoritates in littera, quaere in distinctione ista. Juxta hoc quaeratur :