74. In Translatione s. Clarae.

In 1. Vesperis.
Antiphonae.

1. Clara, luce clarior

Ac sole serenior,

Virtute sublimior.
2. Laude nostra dignior,

Favo mellis dulcior

Et sponso intimior.

3. Adest dies gaudii,

Pharao imperii

Victus cedit impii.
4. Ramus olivae medii

In arca cordis proelii

Aufert causam et taedii.

5. Ave, virgo praeferens
Liam operantem
Nec Rachelem deserens
Deum contemplantem.

Ad Magnificat.

A. Iam vides Deum oculis,
Iam ore fruens poculis

Dulcedinis divinae,
Iam auribus angelica
Melodis audis cantica,

Laetaris sine fine,
Dilectum tenens manibus
Post illum curris pedibus,

Ab ipso amplexaris ;

Consortes redde gaudii
Nos Christique convivii,
Quo mater tu ditaris.

Ad Matutinum.

Invitatorium.

Iesum, Clarae virginis
Sponsum, voce carminis,
Venite, adoremus.

In 1. Nocturno.
Antiphonae.

1. Tu paradisus voluptatis,
Quam rigat fons divinitatis.

2. Lignum vitae te cibavit
Ac in bono confortavit,
Post hanc vitam coronavit.

3. Clara sancta, deprecare
Pro nobis, nec dicas quare.

Responsoria.

1. Mundo splendor oritur,
Dum haec virgo nascitur,
Christo chordis iungitur,
Gratia illabitur,
Ad bonum inflectitur,
Vanum omne tollitur,
Solum Iesum sequitur ;

V. Odor virtutum spargitur,
Mundus sentit, adtrahitur.

2. Clara, Francisci filia,
Agnem sororem praevia,
Vicit parentum taedia,
Hanc trahens ad caelestia,
Declinans mundi devia,
Petens aeterna praemia.
V. Candensve velut lilium

Formosa,
Oculis omnium

Rubens rosa.

3. Virgo pia, Clara,
Mente consternata

Hostium formidine,
Iuncta sponso Iesu
Christo, lacrimata,

Precum fortitudine
V. Digna Iesu vocis

consolamine
Robur sentit mira

cum dulcedine.

In 2. Nocturno.
Aatiphonae.

1. Tu, signifera,

Sanas vulnera

Signo vitae

Dato a te.
2. Voce puella caruit,

Signo dato rehabuit.
3. Valentinus morbo cadit,

Ad sepulcrum Clarae vadit,

Nocte trina iacuit,

Die terna valuit.

Responsoria.

1. Humilitatis praebuit
Exemplum secuturis,
Dum ministrare studuit
Infirmis magnis curis
Ac pedes servientium
Manibus lavat puris ;
V. Obsequio se subdidit
Et cunctis se exercuit
Laborum in pressuris.

2. Holofernem Iudith stravit,
Hostis caput asportavit,
Israelem iucundavit,
Hymnum Deo decantavit;
Hesther pro Vasti regnavit,
Quam Assuerus coronavit
Ac prae cunctis adamavit ;
V. Quidvis, ait, iube, datur,
Genti suae mox precatur
Pacem, fiat, rex effatur.
3. In paupertatis copia
Quaerit gloriari,
Huius mundi inopia
Desiderat ditari.
Nudi Christi consocia
Vult illi conformari ;
V. Pro paupertatis gloria
Paupertatis foedera
Petens intitulari.

In 3. Nocturno.
Antiphonae.

1. O adulescentula,
Mardochaei plantula,
Digna regis chartula.

2. Sunamitis speciosa,

Regem fove operosa,

Nobis esto gratiosa.
3. Sentis regem indignantem,

Placa iram, fac donantem.

Responsoria.

1. O paupertas liberalis,
Quae pro Deo tolerans !
Eruis a famae malis,
Nomen laudis induaris,
Vere dives praedicaris,
Mox abundat; quid miraris?
V. Dum oleum deesse fatur,
Pia mater Clara orat,
Restauratur.

2. Per Aegyptum Nilus vadit,
Claram in desertum tradit,
Igne, nube tegitur,
Caeli manna fruitur,

Verus Iosue deducit,
In promissam terram ducit ;
V. Terram lac et mel manantem

Habes, audi te precantem.
3. Clara, multarum praevia,
De tenebris ad lucem
Per huius [mundi] devia

Trahens ad Christi crucem,
Virginum collegia

Sequuntur quarum ducem,
V. Vita vivens angelica
Inter sororum agmina

Monstrans virtutum lucem.

In Laudibus.
Antiphonae.

1. Veni in hortum meum,
Dulcis filia,
Tuum agnoscens Deum
Carpe lilia.
2. Ascendisti ac fecisti
Cor paratum tibi datum,
Te dilectum audio,
Sine mora venio.

3. Uno pane copia

Pascit Christi filia

Multos bina prandia.
4. Paupertatis praediis

Dives privilegiis,

Laeta fit inediis.
5. Laudat Deam omnium,

Dum praestat solatium,

Ostendens praesaepium.

Ad Benedictus.
A. O fervens desiderio,
Praeclaro clara studio,
Quem legis sponsum lectulo,
Christum crucis in pendulo

Quaerens tenuisti,
Francisci felix aemula,
Salomon mirifica,
Manum mittens ad fortia
Procul de summis praemia

Quae promeruisti,

Nostrorum apud Dominum
Posce veniam criminum,
Quae surdis vices aurium,
Caecis acumen luminum
Mundo reddidisti.

Alia Antiphona.

Ave, virgo felix Clara,
Mater pia, mater cara

Dominarum pauperum,
Sinu pio tu nos fove,
Cuncta mala tu amove,

Placa datorem munerum ;
Quod mater nostra sis, ostende,
Ab omni malo nos defende,

Confer perenne gaudium.

Alia Antiphona.

O virgo mirabilis
Insignis et prodigiis,
Languores daemoniacis

Plurimis mederis,
Das gressum fractis tibiis,
Curam epilepticis

Precibus sinceris ;
O vita laudabilis,

Quae fidem sic magnificas,
Sed et multos vivificas

Mortuos defuncta,
Praeclara nos caelestium
Fac consortes civium,

Quibus es coniuncta.

In 2. Vesperis.
Ad Magnificat.

A. O Clara,

Multarum mater gentium,
Exaudi preces flentium,

Adflictos consolare,
Allatrix sis laetitiae,
Per viamque tristitiae

Nobiscum comitare
Et fac nos semper tecum

Gratulare.

Alia Antiphona.
O decus et gaudium,
O virginale lilium,
Tu iubar ecclesiae,

Gemma claritatis,
Floridum fers virginibus
Speculum prudentibus

Specialis sanctitatis,

Vitae signis radians
In te piae dilectionis

Requievit spiritus,
Dulcis, pia mater,
Clara nobilis,

Iunge nos beatis.