96. De sancto Erasmo.

In 1. Vesperis.
Antiphonae.

1. Laudibus magnificis
Celebret ecclesia
Erasmi pontificis
Votiva sollemnia.

2. A primaevo tempore
Casto vigens corpore,
Gratis micans moribus
Virtutumque floribus.

3. Vir praeclarae sanctitatis
Pulcher erat facie
Geminaeque venustatis
Templum decens gratiae.

4. Ornat floridam aetatem
Decus innocentiae,
Omnem fugat vanitatem
Spiritus prudentiae.

5. Linguam habuit disertam,
Faciem amabilem

Et scientiam expertam,
Vitam venerabilem.
R Erasmus, Deo dilectus,
Christi plebi placuit
Et in praesulem electus

Talem se exhibuit,
Quod gratuitis perfectus
Velut sol emicuit.
V. Verbo fulsit et exemplo
Coruscans ut lucifer
Et columna Dei templo
Crucis signi signifer.

Ad Magnificat.
A. Christe Iesu, pastor bone,
Legis lator et patrone,

Patris sapientia,
A quo strenuum pastorem
Et idoneum doctorem

Accepit ecclesia,
Erasmum, qui profligatus

Pro commissis ovibus
Nostros excuset reatus

Suis sacris precibus.

A d Matutinum.
Invitatorum.

Corde, voce iubilantes
Christo demus gloriam

Et Erasmi venerantes
Martyris victoriani.

In 1. Nocturno.

Antiphonae.

1. Erasmi pontificis

Agentes memoriam,
Agonis multiplicis
Laudemus victoriam.

2. Iussu Diocletiani
Ferbuit malitia,
Puniuntur christiani
Crudeli saevitia.
3. Hanc Erasmus ut audivit
Pressuram fidelium,
Solitudinem adivit
Germinans ut lilium.

Responsoria.

1. Dum intrat solitudinem,
Omnem sollicitudinem

In Dominum iactavit,
Vacans Deo purius,
Quem ob hoc uberius
Christus visitavit ;
V. Visitant hunc angeli
Colloquentes praesuli,
Ibi bene sibi.
2. Septem annis latuit
In arbustis Libani
Praesul venerandus,
Sed latens innotuit
In virtute Domini
Signis admirandus,
V. Sed nec fame deficit,
Cui Christus sufficit,

Quem per corvum pascit,
3. O virum venerabilem,
Magnum et mirabilem,
Pedum cuius vestigia
Ferarum collegia

Sequuntur et oboediunt
Cellamque custodiunt.
V. Iumentisque hominibus
In necessitatibus
Subvenit precatibus.

In 2. Nocturno.

Antiphonae.

1. Vox de caelo sonuit
Et Erasmum monuit
Ad urbem redire
Certamen subire.
2. Intrans urbem daemones
Pellit ab obsessis,
Aegros curat homines,
Subvenit oppressis.

3. Viro Dei praedicante
Et virtutes operante
Multa turba Domino
Adcrevit brevi termino.

Responsoria.

1. Dum Caesar haec percepit,
Sanctum vinci praecepit,
A quo quaerens incepit:
Die nobis, quis es, quid credis ''?
''Vana docens, legi nocens
Fallax incedis.

V. Erasmus: in publico,
Ait, Christum praedico.
Cui plebem dedico.

2. Rex sacrilegus fidelem
Iussit caedi praesulem
Plumbatis post haec fustibus
Pro gratiosis actibus ;

V. Plebs miratur, quod illaesus
Martyr mansit dire caesus.

3. Cerae, picis et sulphuris,
Olei liquore

Ferventi corpus martyris
Perfusum velut rore
Vigebat cum decore ;

V. Laudat nomen Domini
Plebs devota, fide mota
Sancto credens homini.

In 3. Nocturno.
Antiphonae.

1. Terrae motu concutitur
Urbis universitas,
Sed tot signis abutitur
Tyranni perversitas.

2. Ascribens arti magicae,
Non arti deificae,
Quae fiunt mirifice
In sancto pontifice.

3. Quem vinctum in carcere
Magno ferri pondere
Eduxit per angelum
Christus dilectum famulum

Responsoria.

1. Mox ad urbem Lucridam
Caelitus delatus,
Plebis ad spem lucidam

Puer suscitatus,
Gentes stupent et mirantur,
Quater dena milia
Credunt, baptizantur,
V. Probat signis et doctrinis
Christi fidem praesul idem.

2. Cnm audisset turbidus
Hoc Maximianus,
In Erasmum rabidus

Hostis misit manus,
Diversis suppliciis

Torquet hunc vesanus,
V. Occidens de familia
Christi ter dena milia.

3. O pastor egregie,

Doctor legis, agmen regis
Miles et militiae,

Christi signifer fidelis
Caelestibus nos civibus

Iungi fac in caelis.
V. Memor esto pauperum

Paterna clementia,
Ut tuorum operum

Probant beneficia.

In Laudibus.
Antiphonae.

1. Dum Iovis simulacrum
Erasmus evertit,
Ad baptismi lavacrum
Plurimos convertit.

2. Novis hunc suppliciis
Tyrannus invasit
Martyr maleficiis
Invictus evasit.

3. Hunc ignita tunica
Aerea vestivit,
Sed virtute caelica
Flamma vim nescivit.

4. Pix, resina, cera, stagnum
Ignito cum oleo
Refrigerium dant magnum,
Non aestum in dolio.

5. Clauditur ergastulo
Tandem vir fidelis,
Solvitur a vinculo
Virtute de caelis.

Ad Benedictus.

A. Hoc dignum in miraculis,
Quod bis ereptus vinculis

Cursum non explevit,
Sed ductus in Campaniam
Urbem adiit Formianam
Evocatus caelitus
Eius gaudens spiritus

In pace quievit.

In 2. Vesperis.

Ad Magnificat.

A. O beatum pontificem,
Virtutum opificem,
Quo daemones fugantur,
Infirmi curantur,
Idola causantur,

Mors fugit, tot milia
Ad caeli sedilia
Triumphali gloria
Praemissa laetantur.

Alia Antiphona.
A. O gloria pontificum,
O sidus mirificum,

O fidei lucerna,
Nos fide paterna

Domino commenda
Et consueta gratia
Post vitae solatia
Transfer ad palatia

Semper possidenda.