86. De ss. Maximo, Juliano, Felicitate et Innocentio.

In 1. Vesperis.
Antiphonae.

1. Alme pater confessorum,
In caterva fultus morum,
Praesul digne Patavorum,
Advocatus tu es quorum,
O beate Maxime.

2. Incliti sunt bellatores
Sancti Dei innocentes,
Stolas suas abluentes
In sanguine sunt sequentes,
Agnum sine macula.

3. Egregie ensis lator,
Christi miles, propagator
Veritatis, conservator
Nostrae pugnae, tu pugnator
Pro nobis, Juliane.

4. Clara velut Felicitas
Solis jubar et claritas,
Beata cujus bonitas,
Nos fovet sua sanctitas,
Pro clero et interpellet.

R. O pia clementia

nostri redemptoris,

Sic nos beatificas
munere decoris,
V. O celsa benignitas,
caritas amoris.

Ad Magnificat.

A. Clara dies laetitiae,
Qua digna fit inventio
Omnium sanctorum,
Eorum prece sedula
Nos duc ad caeli gaudia,
Jesu, laus angelorum.

Ad Matutinum.

Invitatorium.

Regi regnorum
Deo jubilemus,
Qui sanctorum suorum
nos laetificat
inventione sollemni.

In 1. Nocturno.
Antiphonae.

1. Hi cum mulieribus

non sunt coinquinati,
Caelo gaudent angelis
Dei sociati.

2. Sociatus sanctis Dei
Maximus beatus
Vita fruitur aeterna
Caelis collocatus.

3. Collocatur Julianus
atrio sanctorum,
Spreto mundo digne vivit
vita beatorum.

4. Beatorum coetu gaudet
beata Felicitas,
Cujus placuit aeterno
sponso digna caritas.

5. Caritate decorati
Deo plaudunt coronati
Corona munditiae.

6. Corona justitiae,
venustate morum
Adstat regi gloriae
coetus hic sanctorum.

Responsoria.

1. Dulcis memoria
Digne recolitur,
Dum innocentia
Nobis proponitur
A patre luminum.
V. Claret praeconium ;
Dum innocentium
Adest inventio,

2. Forma justitiae,
Dilecte Domini,
Pastor egregie
Gregis dominici,
Spem dona veniae
V. Nobis supplicibus,
Te venerantibus,
Beate Maxime.

3. Veri solis justitiae
Splendor illuxit hodie,
Coruscans luce gratiae
Julianus,
V. Fulget in caelis gloriae,
Splendet in terrae limite
Vita clarus.

4. Gemma pudicitiae,
Gleba cujus hodie
Mundo revelatur,
Prece tua protege,
V. Beata Felicitas,
Quos delicti gravitas
Gravat nec levatur.

In 2. Nocturno.
Antiphonae.

1. Exsultent hodie
fideles populi,
Nam fit inventio
sanctorum Domini.

2. Sanctorum Domini
refulget gloria,
Quorum applausibus
plaudit ecclesia.

3. Plaudit ecclesia
digno praeconio,
Dum claret hodie
felix inventio.
4. Felix inventio
digne recolitur,
Dum sanctis Domini
laus vera canitur.

5. Laus vera canitur
in terra hodie,
Quibus et praemium
donatur gloriae.

6. Donatur gloriae

caelestis praemium,
His sanctis hodie
pacis in gaudium.

Responsoria.

1. Digna laudatio
fit innocentium,
Quorum laus inclita
laus fuit mentium,
V. Tolle, Jesu, cor morientium
Pro te, rex gentium.

2. Praesul hic est Maximus

laude celsa dignus,
Pater hujus patriae,

mitis et benignus,
V. Nos per hunc suscipiat

celsi caeli sinus.
3. Sume preces, Juliane,
Civitatis Paduanae

Digne fusas hodie,
V. Gloriose mundi victor,

Preces nostras suscipe.

4. Tu decus es munditiae,
Gloriosa Felicitas,
Per te nostra parvitas
Sit accepta Deo,
V. In aeternum gloriaris,
Sponsa Christi singularis,
In excelso caelo.

In 3. Nocturno.
Ad Cantica.

A. In terra Domini
tenent duplicia
Victis suppliciis
sumpta laetitia.

Responsoria.

1. O sacrum depositum
trium innocentum,
Quorum ad victoriam
fides est parentum,
Horum ferens spiritus
supra firmamentum,
V. Cohaeredes Jesu Christi
fiunt in exemplum.

2. O beata Felicitas,
Cujus sic generositas

Placet regi caelorum,

Decus insigne morum,
V. Cara placensque caritas

Sodalis angelorum.
3. Ave, sidus aureum,

Juliane sancte,
Jubar solis fulgidum,

te patrocinante

Nostra sit societas
cum summo regnante,
V. Mundi spreto tramite
Domino donante.

4. Felix mater ecclesia,
Quam Maximi clementia

Maxime decorat,
Cujus grata devotio,
Caelos scandens oratio
Pro nobis exorat,
V. O praecelsum depositum,
Quod supplex haec ecclesia
Tripudians honorat.

In Laudibus.
Antiphonae.

1. Laudibus innumeris
veneratur ecclesia
Diem Sanctorum Domini
devota cum laetitia.

2. Luce splendifica

splendent in aethere
Quondam inglorii
divino munere.

3. Sicut aurum approbati
Spretis mundi dapibus
Caelis gaudent collocati
Juncti caeli civibus.

4. Preces effundite,
dilecti Domino,
Pro cuncto supplici
nostro collegio.

5. Beati sancti Domini,

Qui spreto mundi gaudio
Divino plaudunt nomini.

Ad Benedictus.

A. O mira benignitas

Domini caelorum,
Qui nos sic laefificat

gaudiis sanctorum
Et illos glorificat

vita beatorum.

In 2. Vesperis.
Ad Magnificat.

A. O caelum continens
rex potentissime,

Qui terram ponderas,
sanctorum agmine

Tu nobis conferas
te frui munere,

Quod sanctis tribuis
benignus hodie.