92. De sancto Petronio.

In 1. Vesperis.

Ad Magnificat.

A. Sacrae fidei confessio,

Pulchra et nitens religio,

Dum nocuit nemini,

Sed omnibus profecit,

Nam ut bene meminit,

In conspectu Domini

Petronium magnum fecit.

Ad Matutinum.

Invitatorium.

Adoremus Christum regem

Sanctorum decus omnium,

Qui dilexit nostrum gregem

Sanctum dando Petroniam.

In 1. Nocturno.

Antiphonae.

1. Beatus vir Petronius

In lege voluntarius,

Quam perfecit per opera

Velut arbor fructifera.

2. Sublimis nobilitatis,

Sed majoris sanctitatis,

Hic ante Dominum adstans

Serviebat cum tremore,

Nunc nobis opem ferat.

3. Virgo exsistens corpore

Factus est Petronius

Templum sancti spiritus,

Integer mentis robore,

Praesul praestantissimus

Fit quia divinitus.

Responsoria.

1. Gaude, mater Graecia,

Sic honorificata,

Ovans tanta gratia,

In filio ditata,

Plaudat et Italia

Ab eo visitata,

Praesule Bononia

Laetetur coronata,

V. Cujus sanctimonia

Est late decorata.

2. Nobilis Petronius

Ex genealogia,

Domino devotius

Cum servit in hac via,

Praesul excellentius

In nostra hierarchia,

V. Laudemus ergo largius

Deum in psalmodia.

3. Sororem Petronii

Sub lege conjugii

Sibi copulavit

Sacri rex imperii,

Sociam palatii

Dono decoravit ;

V. Hunc terreni gaudii

Spretorem amavit.

In 2. Nocturno.

Antiphonae.

1. Sanctum suum Petronium

Christus mirificavit,

Vincentem mundi vitia

Bononia firmavit.

2. Precibus assiduis

Deo supplex adstabat

Et sacratis hostiis

Populo complacebat,

Quem tantis pro instantiis

Aeternis providentiis

Jam Christus coronabat.

3. Ex ore Petronii

Doctrina eloquii

Christus suam laudem

Sic perficiebat,

Dum haeresum fraudem

Verbis evangelii

Hujus odor lilii

Rite destruebat.

Responsoria.

1. Haeresnm versutia

His actis inolevit,

Plurima nequitia

In vera nunc desaevit,

Quorum sic fallacia

Regis providentia

Divinitus praevenit,

V. Dum hunc plenum gratia,

Clarum eloquentia,

Reducentem devia

Ob tam dira noxia

Mittere decrevit.

2. Petrus caeli claviger

Apparens Coelestino,

Pastorem oraculo

Admonuit divino,

Ut sanctum Petronium,

Meritis eximium,

Dando pontificium

Bononiam legaret,

V. Ut exstirparet noxia

Tradendoque salubria

Ecclesiam firmaret

Nec aliud temptaret.

3. Dum celebrat concilium

sacrum Coelestinus,

Bononiensis populus

adiit hunc festinus,

Supplicans suppliciter

de patre provideri

Et a diris hostibus

se orphanum tueri,

V. Plorat coram praesule

populus oppressus,

Promens, quam regis rabie

exstitit depressus.

In 3. Nocturno.

Antiphonae.

1. Hic sanctus sine macula

Se servans in justitia

In vera tabernacula

Post hujus vitae tristia

Assumptus est in patria.

2. Terrenorum gloriam

Dum sprevit hic Petronius,

Mentis sanctimoniam

Adeptus excellentius

Gloriae magnae praemia,

Magni decoris dulcia,

Ditatur abundantius.

3. Creatoris benedictio

Beato venit Petronio,

Nam pater erat pauperum,

Largus ut lumen siderum,

Quem magnitudo operum

Civem monstravit superum.

Responsoria.

1. Coelestinus pontifex

Concilio narravit,

Quod sibi apostolus

Petrus revelavit,

Quod audiens consilium

Prorupit in tripudium,

Christum magnificavit.

V. ''Confitemini Domino et invo-

cate nomen ejus, narrate

omnia mirabilia ejus.

''2. Beatus Petronius

se indignum credens,

Provolutus pedibus

Coelestini gemens:

Ut injuncta valeam

onera portare,

Inquit, pater optime,

meritis praeclare,

Omnium factorem

Pro me deprecare.

V. Fili, surge, opere

Dei voluntatem

Comple, legem Christi,

sinceram caritatem

Effugatis vitiis

plantes et sanctitatem.

3. Sacris sumptis monitis

sanctus consecratur,

Civitas Bononia

gaudio laetatur,

Tanti patris gloria

laeta coronatur,

In collapsis omnibus

plene reparatur ;

V. Floribns Hierusalem

Honorificatur,

Justorum patrociniis

Propulsatis noxiis

Sanctitati datur.

4. Te coronat, vir propheta,

Secretorum conscius,

Cleri decus et athleta,

Veritatis nuntius,

Qui ministrat tibi laeta

Munera sublimius,

Tuae sortis clausus meta

Te beat, Petronius.

V. Gratiarum donis freta

Prae tuis consortibus

Te, Bononia, de caelis

Lux lustrat virtutibus.

5. Carnis spicam

contemptus area

Domans sanctus

in virga ferrea,

Ut granum purum

excussa palea,

Sic summi regis

intrat in horrea.

V. Vivo pani morte junctus

Vita vivit vita functus.

6. De sacro ministerio

Petronius hic satiat

Turbam Christi famelicam,

In via ne deficiat,

Iter pandit ad gloriam

Et vitae viam ampliat.

V. Pro spreta mundi tunica

Est indutus gloria,

Cui Christus, spes unica,

Dat ineffabilia

Se et sua gaudia.

In Laudibus.

Antiphonae.

1. Beatus Petronius

Pro nobis intercedat,

Quo beato praevio

Vero dato praemio

Omnis pestis cedat.

2. Hic creaturis imperat,

Qui nutui subjecerat

Se totum creatoris,

Quidquid laesit adversitas,

In aegro sanat sanctitas

Hujus pii pastoris.

3. Hic carnis supercilium

Legi subjecit spiritus,

Mundum vicit et vitium

Se victo victor inclitus.

4. Sacerdotes Dei,

Deum benedicite

In collato nobis

glorioso comite,

Cum creaturis omnibus

voce, manu plaudite,

Ei ut jungamini,

jam moribus satagite.

5. Hic divinis laudibus

Ardenter insistebat

Et de collatis omnibus

Gratias agebat,

Verbis atque moribus

Deum benedicebat,

Sacrae vitae passibus

Velut ostensis dapibus

Plebem inducebat.

Ad Benedictus.

A. Beatus Petronius,

Pontifex eximius,

Dum talenta credita

Domino prudenter

duplicavit,

Aureolae et aureae

Coronae ab ipso dona

reportavit.

A vitae miseriis

Hodie eductus

In mansuris gaudiis

Plene est indutus,

Ubi clamat cum electis

Christi gloria refectis.

In 2. Vesperis.

Ad Magnificat.

A. Sacerdos Dei, beate Petroni,

Pro nobis in ara caelesti

Christo redemptori,

Cui preces quotidie

Fundis, funde libamina,

Precum ut tuis adjuti

Gloriosis meritis,

Post depositum carnis onus

Denario aeterni praemii

Muneremur tecum.