172. De ss. Gervasio et Protasio.

1 a. Fulget dies pretiosa,

Dies felix et formosa,

Dies digna gaudio;

1b. Qua meruit coronari

Gervasius et laudari

Cum fratre Protasio.

2 a. Nam Vitalis horum pater,

Valeria fuit mater,

Deo favorabiles.

2b. Ortu, fide, sanctitate,

Sensu, verbo, dignitate

Clari sunt et nobiles.

3 a. Quibus una die natis

Unoque fonte renatis

Deus unus adfuit.

3 b. Christum solum puro corde

Vitiorum pulsa sorde

Unusquisque coluit.

4 a. Hi pro posse fugientes

Mundum, Deo cohaerentes,

Mortuis parentibus

4 b. Familiae disponentes,

Agros, praedia vendentes

Dederunt pauperibus.

5 a. Inde sancti refutantes

Idolatras et vitantes

Convictus gentilium

5b. Cenaculo se clauserunt;

Hic occulte coluerunt

Summi patris filium.

6 a. Decem annis hic morantes

Visitavit hos orantes

Beatus Nazarius.

6 b. Hos in fide confirmavit,

Per hunc suos confortavit

Christus Dei filius.

7 a. Dumque sanctis praedicaret

Et scripturis informaret,

In anno undecimo

7 b. Sunt Neroni revelati

Atque Romae praesentati

Principi nequissimo.

8 a. Mox ad aram perducuntur

Et a rege compelluntur

Adorare idola;

8b. Sed a sanctis contemnuntur

Atque regis respuuntur

Dicta quasi frivola.

9 a. Contra sanctos iudex saevit,

Atque fervor irae crevit,

Vim facit malitia.

9 b. Inde pugnis flagellantur

Sancti, post incarcerantur

Praesidis invidia.

10 a. Sic pro posse flagellavit

Nec pro voto degravavit,

Quia suos visitavit

Christi providentia.

10 b. Post tres dies hos eduxit

Et ad templum Iovis duxit,

Hic diis immolare iussit

Vel ferre supplicia.

11a. Ad honores hos invitat

Et promissis sanctos ditat ;

Nihil est, quod non promittat,

Ut adorent idola.

11b. Ad hoc sancti responderunt:

Nunquam nobis ista erunt;

Tua vox, rex, clamaverunt,

Est fallax et subdola.

12 a. Non nos census et uxores,

Praefecturas nec honores

Latriae praeferimus;

12 b. Non hic vita nobis datur,

Sed, ut Paulus attestatur,

Futuram inquirimus.

13 a. Deos falsos refutamus,

Deum verum adoramus,

Qui vivit per omnia.

13 b. Post haec in sanctos profani

Bilem cordis et vesani

Commovit superbia.

14 a. Putans sic rex vindicari

Iubet sanctis praeparari

Tormentum non meritum.

14 b. Iubet sanctos verberari

Tamque diu fustigari,

Quod exhalent spiritum.

15 a. Tandem vita temporali

Poena plexi capitali

Migrarunt ad filium.

15 b. Qui cum magna dignitate

Sunt sepulti civitate

Mediolanensium.

16 a. Ubi caecis lux praestatur,

Ubi claudis gressus datur,

Et sanantur vulnera;

16 b. Ubi febres relaxantur

Vi sanctorum et curantur

Cuncta morbi genera.

17 a. O Gervasi, nos dignare,

Tuque, o Protasi care,

Clementer respicere;

17 b., Gravi carne resolutos

Nos velitis labe tutos

Ad Christum perducere.