173. De ss. Gervasio et Protasio.

1. Fratrum praesens contio

Summo cum tripudio

Celebret ecclesia.

2 a. Hodie Gervasius
Simul et Protasius
Coronantur gloria.

2b. Istos simul genuit,
Vide, quantum profuit,
Vitali Valeria.

3 a. Nati de martyribus
Propriis sanguinibus
Meruere praemia.

3 b. Hosque per supplicia
Citavit ad praemia
Neronis malitia.

4 a. Istis causa gaudii
Doctrina Nazarii,
Cuius magisterii

Sunt experti gratiam.

4 b. Sanctis eius monitis,
Praeclaris et inclitis,
Rebus cunctis venditis
Mundi calcant gloriam.

5 a. Non franguntur
Vel vincuntur,
Nec tormentis
Ulla mentis

Celant impotentia.

5 b. Non sacrorum
Aut deorum
Colunt fana,
Sed ut vana

Detestantur omnia.

6 a. Nero videns se contemni,
Simulacra nauci pendi,
Quid agat, nescit anxius,
Saevit et fremit impius.

6 b. Iubet illos decollari,
Fratres ita mente pari
Vitam caducam deserunt,
Qui simul hanc intraverunt.

7 a. Furtim iusti
Iura busti,
Qui venerunt,
Impenderunt

Martyrum corporibus.

7 b. Hic sanantur,
Hic curantur,
Aut obsessi,
Vel oppressi

Variis languoribus.

8 a. Ergo, fratres, vos precamur,
Apud Christum consequamur
Vestra prece
Nos de faece

Mundi mundos fieri,

8 b. Ut post huius vitae cursum
Nos ad aulam poli sursum
Christus vocet
Et collocet

Suo dextro lateri.

9, Amen dicant singuli.