311. De sancto Severino.

1 a. Sonet intus, pangat foris,
Cordis chorda, melos oris
Severini merita.

1b. Citharizet Severinum,
Peregrinans peregrinum
Plebs haec sibi credita.

2 a. Noster pius intercessor
Sanctus iste sit confessor
Pietate solita,

2 b. Cuius prece destitutis
Procuratur spes salutis,
Est et merces reddita.

3 a. Cuius laudis debitum
Nostrum firmet spiritum
Carnis lege domita,

3 b. Quem ob vitae meritum
Apud Gallos inclitum
Fama reddit inclita.

4 a. Erat iste flos inclusus,
Sed est odor huc infusus
A remotis partibus.

4 b. Flos in fructum pullulavit,
Fructum, quem hic mendicavit
Locus suis civibus.

5 a. Aegritudo premit regem,
Rex laborat, turbat gregem
Pastoris afflictio.

5 b. Ruit turba medicorum,
Stupet sensus peritorum,
Decipit et ratio.

6 a. Infirmatur vis herbarum,
Non salutem rex earum
Sentit beneficio.

6b. Iam de rege desperatur,
Medicantum defraudatur
Suo spes augurio.

7 a. Adest puer dicens regi:
Pastor quidam praeest gregi,
Vitae clarus merito.

7 b. Morbus iste curam nescit,

Omnis labor evanescit

Servi Dei digitio.

8 a. Crede per hunc, rex, abbatem
Dari tibi sospitatem,
Tua solvi vincula.

8 b. Acquiescit rex dicenti,

Praesens vovet iam absenti,
Delegatur vernula.

9 a. Implet puer votum regis,
Ab ovili pastor gregis
Exit raptus precibus.

9 b. Clamat turba subditorum,
Stagnant genae monachorum
Lacrimarum fluctibus.

10 a. Quo vir transit Agaunensis,
Languet praesul Nivernensis
Cunctis suo iam suspensis
Membris ab officio.

10 b. Iacet surdus, cubat mutus,
Omni sensu destitutus;
Intrat abbas, intrat tutus
De Dei solacio.

11a. Cum descendit aegrotanti,
Preces fundit, in instanti
Favet Deus imploranti,
Impetratur venia.

11b. Omnis dolor relegatur,
Vitae praesul reservatur
Et altari praesentatur
Peregrini gratia.

12 a. Hoc ad regem accedente
Se leprosus fert repente
Instrumento saeviente
Mendicans munusculum;

12b. Ad quem Dei vir festinat
Et se supplex huic inclinat,
Cedit lepra, dum propinat
Illi pacis osculum.

13 a. Clodovei subit tectum,

Inthronizat hunc ad lectum,
Videt illum iam deiectum,
Pati fere iam defectum
Prae dolore nimio.

13 b. Cuius plaga sauciatus

Dat in terram se prostratus,
Instans preci vir beatus,
Nec est suo defraudatus
Sanctus desiderio.

14 a. Medicina spiritali

Pius princeps corporali
Sospitati redditur.

14 b. Absolvuntur omnes rei
Interventu viri Dei,
Omnis carcer panditur.

15 a. Expleturus vatis munus:
Est hic, inquit, locus unus
Manens hoc corpusculum.

15 b. Mons desertus a colonis,
Castrum vocanthuncNantonis,
Mihi servat tumulum.

16 a. Hoc in loco vir quiescit,
Qui repulsam pati nescit
In suorum venia.

16b. Imploremus hunc patronum,
Eius nobis vitae donum
Conferat praesentia.