258. De sancto Martino.

1 a. Lauda, Sion, gloriosum
Confessorem, virtuosum
Sanctitatis gratia.

1 b. Cantus dulces resonemus
Et Martinum exaltemus
Speciali gloria.

2 a, Laudabilis hic Martinus,
Non humanus sed divinus
Fuit ab infantia.

2 b. Primo regnum exquisivit,

Iussa legis custodivit

Iuxta evangelia.

3 a. Vestiendo denudatum
Munus dedit Deo gratum,
Quod recepit Dominus.

3 b. Illa nocte loquentem audivit:
Hac me veste Martinus vestivit
Adhuc cathecuminus.

4 a. Tandem iste baptizatur,
Et lex Dei confirmatur
In eius memoria.

4b. Sub Caesare militavit,
Militare recusavit
Per longinqua spatia.

5 a. Sed rex coepit adfirmare
Militem hune dubitare
Pro bellico cuneo.

5b. Hostes tamen subiugavit,
Signo crucis triumphavit
Non protectus clipeo.

6 a. Deum tantum praedicavit,
Quod parentem revocavit
Ad baptismi praemia.

6 b. Hic Martinus gloriosus
Nunquam fuit otiosus
Hora vel dimidia.

7 a. In ordine monachorum
Usu spreto proeliorum
Conversari voluit.

7 b. Posthaecpraesulconsecratur,
Cuius vita non mutatur,
Sed magis resplenduit.

8 a. Febre gravi fatigatur
Et magis hic conabatur
In Dei servitio.

8 b. Iam terrenis non vacabat,
Caelo totus inhiabat
Indutus cilicio.

9 a. Cultum delet idolorum
Suscitator mortuorum
Trinorum magnificus.

9 b. Dum celebrat sacramenta,
Confert albae paramenta
Nuntius uranicus.

10 a. Nam qui febre vexabantur,
Vestimenti sanabantur
Hi tangendo fimbriam.

10 b. Hic leprosum obsculatur,
Et leprosus mox sanatur
Deo donans gratiam.

11a. Discipulos congregavit,
Illis mortem praedicavit,
Grex devotus tunc ploravit
Pro pastore sedulo.

11b. Pro grege dat deprecamen,
Si necesse sit iuvamen,
Nec recusat hoc gravamen
Subire pro populo.

12 a. Praestolante non terretur
Ab satan, ut moreretur,
Sed eidem confitetur:
Nil in me reperies.

12 b. Post haec sanctus exspiravit,
Caeli cohors obviavit,
Et hunc Deus collocavit,
Ubi manet requies.

13 a. O Martine gloriose,
Te petimus lacrimose,
Vitae cursum taediosae
Transeamus virtuose.
O compar apostolis.

13 b. Iesum Christum deprecare,
Cum coeperit iudicare,
Ne nos velit condemnare,
Sed faciat nos regnare
Tecum in caelicolis.