204. De sancto lterio.

1. Iterii sacra gesta,
Sion, pangens manifesta
Cum dulci melodia.

2 a. Huic pupillo mors pusillo
Tam paterna quam materna
Abstulit auxilia.

2 b. Quem assumpsit Deus pater,

A quo datur ei mater

Frugi philosophia.

3 a. Hunc studens haec erudire
Facit quaeque eum scire
Sciri possibilia.

3 b. Licet artem sciat quamque,
Plus ethicam physicamque
Habet in memoria.

4 a. Mores docet ethica,
Morbos sanat physica,
Quae sunt necessaria.

4b. Plus istarum artium
Placet exercitium
Ad plebis suffragia.

5 a. Mores serit, morbos sanat,
Ab eodem duplex manat
Opis affluentia.

5 b. Fama volans laudes edit,
Ruunt aegri, sospes redit
Quilibet ad propria.

6 a. Laude timens mentem quati,
In eremo latens pati
Multa ducit anxia.

6b. Ibi tandem reperitur
Et a multis hic aditur,
Cunctis dat remedia.

7 a. Fama scitur circumquaque,
Huc aperte fluit quaque
Plebis abundantia.

7 b. Via fit latissima,
Quae fuit strictissima
Vixque feris pervia.

8 a. Vult cedendo laudis guerrae
Ad Ligures se transferre
Discedens a Gallia.

8 b. Mandat Deus, ne discedat,
Sed mittendis viris credat
A Romana curia.

9 a. Duo viri sensus miri
Sunt electi et directi
Per papam in Franciam.

9 b. Dum mandata sibi data
Exsequuntur, perducuntur
Ad sancti notitiam.

10 a. Eius fama sanctitatis,
Scientiae, potestatis
Tandem nota fit legatis
Per experientiam.

10 b. Ab his papae praesentatur,
Inde papa gratulatur,
Romae multa plebs sanatur
Propter sancti gratiam.

11a. Misso scripto de supernis
Episcopus fit Nivernis,
Solaciis urbs paternis
Orans currit obviam.

11b. Fitcontractusperhuncsanus,
Et post terga vinctus manus
Adeptus est vir insanus
Sanitatis copiam.

12 a. Cathedratur pastor bonus,
Non decus sumens sed onus,
Gregem docet, fovet, servat,
Carni suae coacervat
Summa paenitentia.

12 b. Cum sic diu plebem rexit,

Huncad caelos Christus vexit,

Cuius prece sic in caelis

Nobis, Christe, dare velis

Sempiternam gloriam.