195. De s. Iohanne Baptista.

.1 a. Is, qui solus est ens per se,
Rei factor universae
Iuxta suum libitum,

1b. Sola cuius voluntate

Rerum vices sunt mutatae
Tempusque dispositum,

2 a. Senescente mundi die
Finem dedit prophetiae
Nato senum filio.

2b. PlusIohannesquampropheta,
Prophetiae datur meta,
Legi limitatio.

3 a. Gabriele nuntiante

Discit pater eius, quantae
Sit futurus gratiae.

3 b. Audienti nati vitam

Nec credenti rem auditam
Ligantur arteriae.

4 a. Ventre clausus ventre clausum
Sentit Christum et adplausum
Facit puer puero.

4 b. Venientem veneratur,
Qui, cum mater salutatur,
Exsultat in utero.

5 a. Eo nato sunt laetati

Tam vicini quam cognati,
Sicut dixit nuntius ;

5 b. Eo nato sunt soluti
Nodi vocis patris muti,
Quia vox est filius,

6 a. Vox clamantis per desertum,
Praeco, cuius os disertum
Ad Christi praeconium,

6 b. Cuius odor famae bonae
Christum in opinione
Facit eum plurium.

7 a. Sed se Christum negat esse
Christum monstrans et expresse
Denotans ad digitum,

7 b. Quem baptizans in Iordane
Super ipsum videt plane
Descendentem spiritum.

8 a. Ob uxorem tentus malam
Detestatur tamen palam
Regis adulterium,

8 b. Quem idcirco rex decollat,
Ut in disco caput tollat
Saltatrix in praemium.

9 a. O nefanda religio,
Pro vitando periurio
Perpetrat homicidium,

9 b. Immo propter adulteram
Scienter iurat perperam,
Ne desit maleficium!

10 a. O quanta, Deus, tolerat,
Quo maior non surrexerat
Inter natos mulierum!

10 b. Meretrici addicitur,

Sic omne ius subvertitur,
Sictotumfitpraeposterum.

11a. Nos per Iohannis merita,
Deus, ex alto visita
Pacis in viam dirigens,

11b. Ut cum iudex adveneris,
Assignes nos in dexteris
In vasa tua colligens.