288. De ss. Ravenno et Rasipho.

1 a. Lux iucunda, lux insignis,
In qua laudes laude dignis
Resultant martyribus !

1b. Laus Ravenno Rasiphoque,
Immo Christum in utroque
Laudemus pro viribus.

2 a. Intra mundum prorsus mundi
Contempserunt vitam mundi
Currentes in stadio,

2 b. Bravium sunt consecuti
Et aeternae retributi
Coronae stipendio.

3 a. Fratrum duxit sanctitudo
Vitam solitariam,
Contemplandi solitudo
Ministrat materiam.

2 b. Potus aqua, panis victus
Carnis in interitu,
His cum carne fit conflictus
Triumphante spiritu.

4 a. Triumphales medici
Morbos tentos duplici
Verbo sanant simplici
Ductu caritatis.

4 b. Corpus infestantia
Curat artis gratia,
Mentis fugat vitia
Virtus sanctitatis.

5 a. In dieta medicorum
Relevatur infirmorum
Desperata sanitas ;

5 b. Frater fratrem sustentabat
Et in factis parentabat
Carnalis fraternitas.

6 a. Circumquaque fama crevit,
Quos puniri mox decrevit
Tyranni vecordia.

6 b. Iuxta fontis aquae rivos
Trucidavit fontes vivos
Lictorum perfidia.

7 a. Caesae dextrae poena plexus
Tota Christum et amplexus
Ravenni fiducia;

7 b. Caesus membris minoratur,
Sed in fide maioratur
Rasiphi constantia.

8 a. Dum mactatur
particulariter,
Patiuntur

membra pluraliter;
Martyr transit,

sed temporaliter,
Resurgendus
potentialiter
Nec differtur.

8 b. Destitutus

fratris solacio
Dum Ravennus

dolet supplicio,
Fratrem fratri,
socium socio
Rediyivum
reddit oratio,
Quae profertur.

9 a. Pares fide, passione,
Digna Dei sanctione,
Pari simul mansione
Conversantur iterum,

9 b. Ut currentes fide bona,
Recepturi vitae dona
Fratrem neuter in corona
Praeveniret alterum.

10 a. Consummata

carnis militia
Post paucorum

dierum spatia
Recepturi

dona duplicia
Summi regis
intrant palatia
Passu pari.

10 b. Iesu, victor

et spes victoriae,
Conversantes

hic transitorie
Fac in libro

scribi memoriae,
Immo tecum
in regno gloriae
Gloriari.