261. In Translatione s. Martini.

1 a. Ad honorem Christi regis

Psallat chorus huius gregis

Morum concordantia.

1b. Colat nostri carmen oris

Celebrando confessoris

Martini sollemnia.

2 a. Hic est gemma sacerdotum,

Cuius lenit orbem totum

Famae recolentia;

2 b. Forma cuius sanctitatis

Tam subiectis quam praelatis

Dedit exemplaria.

3 a. Pannonia dedit ortum,

Hunc Ticini circa portum

Aluit Italia.

3b. Hic instructus in scripturis

Cunctis mundi spretis curis

Spirat ad caelestia.

4 a. Mox legatur cum Romanis

Subiugandis Gallicanis

Urbis ad imperia.

4 b. Hic in primis militavit,

Hic inermis subiugavit

Armatorum milia.

5 a. Dum saeviret brumae pestis

Ambiani trunca vestis

Nudo datur, cuius testis

Fit in visu Dominus:

5 b. "Ista veste vir divinus

Calefecit meos sinus,

Hac contexit me Martinus

Adhuc catechuminus."

6 a. Post baptisma salutare

Ius abhorrens militare

Sperans Christo propinquare

Adiit Hilarium.

6 b. Nota praesul causa viae

Consolatur pium pie

De supernae lucis die

Tribuens consilium.

7 a. Ferrum librans quidam furum

Iter sancto parat durum,

Sed Martinus se securum

Affirmabat penitus;

7 b. Alter manum cum securi

Tenens cessat ictum furi,

Cui statim cordis puri

Donum datur caelitus.

8 a. In errore mortis atrae

Persistente diro patre,

Baptizata pia matre

Redit ad pontificem.

8 b. Factus forma monachorum,

Suscitator mortuorum,

Mox assumpsit Turonorum

Cathedralem apicem.

9 a, Globus ignis coruscantis

Super caput consecrantis

Quasi vox est adclamantis:

" Compar es apostolis .

9 b. Huius exstat index rei

Sacramentum iubilaei,

In quo Christus ignem Dei

Suis misit incolis.

10 a. Ad mandatum viri fortis

Fugit agmen pravae sortis:

Lepra, daemon, sopor mortis,

Mergus et barbaries.

10 b. Post collectos pacis fructus

Carne praesul est eductus,

Terra suos agit luctus,

Caeli canunt acies.

11a. Severinus sonos audit,

Dum Martino vox adplaudit

Caelestis consortii.

11b. Corpus sancti quiescentis

Sepelivit dormientis

Spiritus Ambrosii.

12 a. Ergo, decus confessorum,

Te canentum rege chorum,

Plebem tuam visita,

12 b. Ut per tua, quod precamur,

Regnum vitae couscquamur,

Alme pater, merita.