Articulus 2A

Argumentum 1

Ad secundum sic proceditur. Videtur quod motus ascensionis fuerit violentus. Act. 1: elevatis manibus ferebatur in caelum. Sed latio, ut dicitur 7 physic., est species motus violenti.

Ergo ascensio sua fuit violentus motus.

Argumentum 2

Praeterea, in corpore suo, cum esset solidum, dominabatur terra. Sed omne tale naturaliter movetur deorsum, et per violentiam sursum. Ergo illa ascensio erat violenta.

Argumentum 3

Praeterea, omnis motus naturalis causatur ex motu caeli. Sed caelum non habebat aliquam causalitatem supra corpus christi. Ergo motus ille non erat naturalis.

Argumentum 4

Praeterea, omnis motus qui est in locum peregrinum mobili, est motus innaturalis. Sed ascensio christi fuit hujusmodi: quia dicit Gregorius, super illud: homo quidam peregre proficiscens: caro ad peregrinandum ducitur, dum per redemptorem in caelo collocatur. Ergo illa ascensio fuit motus violentus.

Sed Contra 1

Sed contra, omnis motus violentus inducit lassitudinem.

Sed ascensio christi non fuit talis. Ergo non fuit motus violentus.

Sed Contra 2

Praeterea, nullus motus violentus est propria virtute mobilis. Sed christus propria virtute ascendit, ut patet Isai. 63, 1: gradiens in multitudine fortitudinis suae. Ergo ascensio ejus non fuit motus violentus.