Articulus 8A

Argumentum 1

Ad octavum sic proceditur. Videtur quod inconvenienter distinguantur isti gradus caritatis.

Quia perfectio caritatis consistit in hoc quod deus ex toto corde diligatur. Sed hoc non est possibile in via, ut supra dictum est, distinct. 27, quaest. 3, art. 2. Ergo caritas in via non potest esse perfecta.

Argumentum 2

Praeterea, illud quod est semper in augeri, non potest esse perfectum. Sed caritas, quamdiu in hac vita sumus, semper potest augeri, ut in 1 Lib., dist. 17, quaest. 1, art. 1, corp., dictum est. Ergo non potest esse perfecta.

Argumentum 3

Praeterea, in quolibet motu possunt accipi infinita media inter primum et ultimum. Sed caritas incipiens est quasi principium motus; terminus autem perfectio caritatis est. Ergo possunt infiniti gradus assignari.

Argumentum 4

Praeterea, quando incipit, etiam est proficiens.

Ergo non debet distingui proficiens ab incipiente.

Sed Contra 1

Sed contra, vita spiritualis similatur vitae naturali.

Sed in profectu naturalis vitae assignantur determinati gradus aetatum. Ergo et in caritate, secundum quam est spiritualis vita animae, debent determinati gradus assignari.